tgoop.com/FkamhSnanee3/22513
Last Update:
السلام عليكم ورحمة الله وبركاته🤏
✿سيتم انزال « الجزء الاول»
من روايه ( ❤️ كانـت لـي ♥️ )
للكاتبه والراويه ( عبير الكبسي )
جلست على الكرسي قدام المرايه ، اتفرج المرايه رغم زحمه المكان الي انا فيه والاصوات.. الا ان الاصوات الي ف راسي والافكار كانت اكثررر من ربشه المكان . صامته فعلا بس داخلي الف سؤال وجواب..! مستسلمه لواحده تسرح شعري والثانيه بترسم بريشتها وتبرز مفاتن جمالي.( كان راسي مزززحوم بالافكار، كم بيكون ف الصاله اليوم ؟ بيجي الكل او البعض ؟ واهم شي صحباتي هل كلهن بيحضرين او بسمع الاعذار من بعضهن ! واما نديم يعلم الله ايش بيسوي ذلحين راح الصاله حق الرجال او ف البيت بيتجهز ؟ بيفكر فيني او لا !! مددددرررري كيف.. المهم انا الان كيف بايكون شكلي!! الفستان وهو معلق شكله عادي رغم انه غالي وماكرهن وصل لي.. اعترف بطبعي ومزاجيتي وغروري ابدا ماتغريني الاشياء المتاحه للجميع احب اكون متميزززه وانا فعلا استحق التميز لاني مميزه واحده مثلي وبجمالي ليش ماتتوفر لها كل هذه الاشياء.. يا عروووسه : ايش رايك مكياج هادئ او ملفت للانظار وثقيل ؟
قاطعت تفكيري الكوافيره بسؤالها ولكن جوابي ماختلف عن تفكيري الي كنت فيه قلتلها : افضل المكياج الهادئ يناسب ملامحي الرقيقه لانه نديم مايحبش المكياج ....وكملت الجواب داخل نفسي وقلت : اما لفت النظر ف انا لفتته بشخصيتي الي خلته يحلم يوصل لي ( ما اسخف ثقتي الزايده بك يانديم ولكن كلنا البنات لما نوقع ف الحب ونعشق نكون على ثقه تامه وعمياء في الي بنحبهم ).. بعد ما خلصت تمكيجني واستغربت من البنت الجميله الي ف المرايه معقول انا !! حبيت شكلي وانا عروسه عشقت ملامحي اكثر وزادت ثقتي وغروري بنفسي... واخيرا وقعت عروووسه .. واخيرا جا اليوم الي نكون فيه مع بعض يد بيد ونرقص رقصه العرسان... لو تعرف كم احبك يانديم وكم انتظرت اليوم الي نكون فيه مع بعض.. حاسه مش بس بتزوج زي بقيه البنات لا... بنتشارك حياه واراء واحنا مع بعض بيكون لنا بيتنا لحالنا واشوفك كل يوم وتشوفني بالحلال بانعوض كل ايام الصبر والانتظار بعد اربع سنواات .. فرحت بك واني خلصت الجامعه اكثر من فرحتي بالشهاده الي حلمت بها عمري .. وكنت انت اهم احلامي وافضلها الي تحققت
لو تسمع دقات قلبي وتشوف تطريزه الفستان بتدق مع كل نبضه ف قلبي مثلها مثل عقارب الساعه الي بتتقفز من رقم للثاني .. غرررريبه رغم اني حاسه ان الوقت بطيء مش راضي يعددددي وايحين بانلتقي مع بعض !!
اخت العروسه : اين نادددين.. نادين بضبح : روان اخيرا جيتو لي ..ليش تأخرتو لي نص ساعه من وقت ماتميت.
روان : يوووو نادددين والله ماعررفتششش .... يوو كيف وووقعتي فضيععععه ..تجنني ..تووووحفه
واحده من الي ف الكوافير : صلي على النبي وتعوذبي من الشيطان.. روان : بسم الله ماااااشاءالله صلاه ع النبي ووووقعتي تحففففه يابنت اللذينا.. نسيتيني ماشتي اقل تغيررررتي... ((مسكت طرحتها وبعدتها من كتفها )): واااو اسكه دوري اشوف التسريحه ... نادين بضحكه وخجل لفتت ورجعت مكانها شافت التلفون في يد اختها : تلفونش مولع ف حد بيتصل
روان ( شافت المتصل): يووو البسي سررريع هيا اخي خارررج
نادين بتووتر بتتلفت من حولها : يوووو ياروان خلاص قرحت قلبي اختش مبورررده ..احس نفسي مضيعه شي اديتو معي الاء ومن اول ماوصلت ماسكه التلفون ..لفلفي ادواتي وشنطتي
روان : طيب طيب انتي لاتهمي شي اهدأي انا شالف كل شي انتي اجلسي هانك عشان هنا حمى بايخرب المكياج
نادين: طيب هاتي تلفوني من عندها وعبايتي
روان : طيب .. ، وبعد ماوصلت البيت كان في راسي مزززززيج من الاصوات... هدار النسوان ولعب الجهال ورقص البنات والتصفيق ،، ضجيييييج ولكن صدى افكاري طغت على جميع هذك الاصوات ، كنت اشوف نفسي في بيتنا وكأني بينودع طفولتي هنا لعبت وهنا انضربت وهنا اتعاقبت وهناك بقعتي المفضله لما اكل ، واهم كل الاماكن لقلبي هذك الزاويه في غرفتي الي تعودت فيها التغطيه تكون عاليه كنت انحشر فيها عشان نتكلم ونسهر ، واليوم بودع كل زاويه في بيتنا وباعيش معك في بيتنا ومملكه احلامنا الي انتظرناها .. شعوري شعور غريب مابين شوق وفراق ، شوقي لك وصعوبه فراقي لأهلي .... روان : نااااادين اليوم احسش في واااادي ... نادين : مالش
روان : انتي الي مالش سارررحه ! مال ملامحش هكذا ابتسمي انبسطي اليوم احلى يوم في حياتش حتى نجود وامينه(خواتهن من الاب) مستغربات عليش
نادين : ليش ايش فيني !
روان : من حقهن التعليقات واللغاجه بيقولين هذا الي جننتنا علشانه وغيرت نظام الاسره وادته من خارج قبيلتنا ومع هذا كله مش مرتاحه
BY طنافـس🎻 وروايات 🇾🇪
Share with your friend now:
tgoop.com/FkamhSnanee3/22513