tgoop.com/FkamhSnanee3/22518
Last Update:
ابو نديم طلع السياره وشافها جالسه بتبكي ، سااااكت شغل السسياره ومش عارف ايش ناويه عليه مش عارف يبرر الي حصل : بانروح بيتنا لما نفهم الي حصل..
نادين في حااله صدمه كل خطوه مشيتها بتتذكرها الأمس كانت عروسه واليوم كأنها ماشيه جناززه
((كيف كنت بالأمس
ورده يكسوها فستان زفافها الابيض جمالا فوق جمالها
واليوم كأنني ارتدي ثوب السواد واقيم على صدمتي بك عزاء
اشعر وكأن روحي مريضة تلفظ انفاسها الأخيره..
روح لا تعرف الحب
و لا الكره
مابين السماء والارض
بعد ان اجتاحتني قسوتك
العاتية
ودفعتني الى
اقصى حدود الألم
((خيانتك كانت لي قاسية))
الموت ارحم منها ، وياليتنا متنا بحادثة الأمس
ياليتنا متنا سويا على حب ولم نصبح اليوم على خيانتك لي..
ولا أرى مارأيت اليوم !!!
المصيبة انني لحظه اكتشافي خيانتك
لم أستطيع الكف عن حبك وكأني ارى
وكأني ارى مارأته عيناي من شخص اخر لايشبهك ابدا
أرأيت مدي جنايتك...!!
أشتاق اليك
و أكرهك
و احبك
و لم أستطيع حينها ان أرسو على شعور، وعندما رسيت
وجدت نفسي في هذه اللحظه منهارة
كل مشاعر الحب تبدلت كره..
اشعر وكأنيي جثه هامده لاروح فيها تقف امامك على الأرض و لكن روحي هائمة بك..
بقدر حبي لك كرهتك.. بقدر شوقي لك حقدت عليك.
جعلتني من إمرأة مغروره بك إلى إمرأة غبيه جدا..))
ابو نديم : نااادين امسحي الي حصل ف وشي خلينا نوصل البيت ونتفاهم لاقد تكلمي حد من اهلش ، انا بحكي لش كل الي حصل وعتفهمي وبعدها لش القرار !!
بيت اهل نديم..
عمة نديم : انا مروحه ونلتقي ف الثالث..
ام نديم متووتره من المشكله وتشتي يروحو قبل ماتوصل نادين ونديم : تمام الله معاكم وتسلموا تعبناكم ..
عمة نديم : الله المستعان مابش تعب ولا شي
منال بتشاور يسرا : قوووا كلميهم يخلوني امسي قوووا ..
يسرا : ياعمه قوا خلو منال تمسي عندنا للثالث وروحت
عمة نديم : مش ضروري من عيعاوني ف البيت تعب يابنتي
يسرا : تعالو تغدو عندنا بكره ثالث..
ام نديم بتبهرر ليسرا : عمتش تاعبه يابنتي
عمة نديم : يلله عشان بنت اخي القمر ماسخى اغثيها .. امسي.. بس جي ذلحين لفي لي اداتي..
منال راحت مع امها للغرفه.
يسرا شافت امها مش طبيعيه : مااالكم ! ليش زعلتو
امها : مش وووقت العزايم يابنتي مانشتي نفتضح قبال خلق الله تعرفي عمتش ماشاءالله
يسرا : مالكم خوفتوني
امها : نادين تشتي تتطلق يعلم الله ايش قد وقع
يسرا دقت صدرها بصدمه : يوووو ليششش ؟؟ تصايحوا !
امها :مددددري يابنتي مدري خلاص رااااسي عينفجرررررر ..اخوش هذا قرح قلبنا قلنا عيتزوج ويعقل وانه مابش فايده فيه
يسرا :كيف مابش فايده فيه ! من يوم ماعرف نادين وحبها تغيررر ..
امها : ودعي عمتش للباب واديلي ماء وحبه راس خلاص قد راسي بيلف
يسرا : طيب.
فوق السياره..
ابو نديم : طيب مارأي بنتي ننزل نتعشى ف مطعم ونلوي انا وانتي ..
نادين : لا ياعم ماليش نفس لشي
ابو نديم : ماترفضي عزومه عمش لو.... سكت وكان بيجرحه بالكلام لو تم الجمله ( لوكان نديم انش وافقتي).
نادين : مره ثانيه ان شاءالله بس الان ماينفعش
عمها : طيب ع راحتش ..
بعد سكوت خمسسس ثواني
عمها : نااادين زوجش قال انش شفتي رساله من واحده كانت زمان بتلاحقه وانها صحبتش صحيح !
نادين بنبرره قهر : صحبتي انااا ! او صحبته هوو
كذاب واناني.. وراكم الرسايل كلها او حذفها !
عمها وقف جنب البيت: طلبته التلفون وناولني وقدو مكسر يمكن لما عصب .. المهم انزلي الان ارتاحي بطفي السياره والحقش اطلعي غرفه يسرا لان البيت مليان مانشتي حد يحس شي
نادين فتحت باب السياره وع نزلتها : ماعرفش غرفه يسرا ..
عمها تنهددد : صح نسيت، الله يسامحك يابني بس.. يلله يا بابا دقيقه بس اقفل الباب..
نادين طيب : رفعت اللثمه شويه تتنفس ونزلت وكان كم العبايه مفتوح بان النقش
عمة نديم فتحت الباب وخرجت : يووو وانتي من ؟
نادين غطت اللثمه وارتبشت: نادين
عمة زوجها : يو ماداش عادش روحتي ؟؟
اخوها : جت هي ونديم يتعشوا ويسمرو شويه معنا ويرجعو البيت..
اخته : وفين هو ابن اخي ابسره واسلم عليه من حين مابسرش وطار مخه شلش ولا عاد تصورنا ولا ابسرنا له صوره..
نادين داخل نفسها : وياليته ماشلني ولا جيت من اصله....!
ابو نديم : الان عيلحق ، اوصلش يا اختي ؟
اخته : لا تسلم قد ابني مراعي ادخل انت اسمر معهم.. خاطركم..
ابو نديم : هيا ادخلي يا بنتي ..
نادين مشيت وكل خطوه كانت تمشيها بين الامس واليوم ووووجع ...
يسرا ماعرفت كيف تستقبلها بمحاجر وزعاريط ولا بحزن عليها : حيا نادين ادخلي
ام نديم متوتره ومش عارفه تتكلم : تعالي يابنتي اهلا وسهلا ببيتش الثاني
نادين بنظره وكانها بتقول : اين بيتي الاول عشان يكون لي ثاني .. انا انهديت..
ام نديم : الله يلعن ابو الشيطان ويلعن عيون الناس
نادين : ايش من عين ياعمه ! مش كل مشكله في حياتنا تكون بسبب عين .. بالذات الي بيننا إنسانه بكلها مش بس عين
BY طنافـس🎻 وروايات 🇾🇪
Share with your friend now:
tgoop.com/FkamhSnanee3/22518