tgoop.com/Giiii6/11067
Last Update:
صحيت لقيت المطبخ نضيف....الحوض فاضى❤️
و عندى لحمة مفرومة متعصجه
لحظة نعيم...الستات بس اللى فاهماها...
سلقت المكرونة و صفيتها.. فى الحوض الفاااضى😅❤️
و دخلت صينية المكرونة بالبشاميل الفرن و قعدت اشرب شاى بلبن و صوت المنشاوي بيقرأ الربع بتاعه فى الإذاعة...
البيت ريحته اكله حلوة
وجبة سخنة....
نص ساعة تحسي فيها إنك ملكة الكون كله...
ولا كإن مسئوليتك المتلتلة مستنياكي على باب الاوضه...
لا باب الأوضه ايه....على باب الكنبه و حياتك 🙈الصغننه ماسكه رجلك و بتطلب طلاسم غير مفهومة...ترجمت منها إنها عاوزه خيار😂❤️
مين قال إن إحنا ضد التستيت و بنحب الشغل اكتر من بيوتنا؟
نص ساعة هاديه و البيت نضيف بتحسسني إنى متحققة تحقق "وزيرة"...اه و الله
مع إنى مش عارفه شكله إيه تحقق الوزيرة😂
بس هى لحظة روقان من بتاعة ملكات الكوكب دى ❤️
إحنا مش بننزل الشغل نثبت ذاتنا
إحنا مش مضطرين نثبت لحد حاجه
إحنا أماننا و راحتنا بيوتنا....حتى لو جمعنا ملايين
الشغل ساعات بيبقى بيت أوسع...
باب رزق للولاد اللى بتكبر...
صُحبة و لحظات تفصلي بيها....
ناس نكلمهم بدل ما نكلم الحيطان
عالم أوسع...دروس أكتر....
أنا تانية...نسخة تانية بتعرف...بتتقدر
واحده بتضحك فى وشك...ست كبيره بتدعيلك دعوة حلوة
و ساعات بيبقى عالم الحيوان....و شقى بره و شقى جوه
الست كامله فى أى حته
نفس العين بره و جوه...
نفس القلب اللى بيحس و المخ اللى بيدبر
نفس الروح...بس الطباع بتتغير حسب ما انتوا بتقابلوها
اللى عندها طاقة تكفى بره...تطلع تساعدنا نعيش فى دنيا أحسن
و اللى سكنها جوه بيتها مكفيها تفضل ...
ما تحكميش على نفسك
بلقب ولا من غير لقب
إنتى كاملة فى أى حته...
إنتى "إنتى" ...
فى البيت...فى الغيط...فى قصر الرياسه
ست جدعة و طيبه...و بتحاول
هنعوز إيه احسن من كده؟؟
ها و قد إنتهت لحظة الفلسفة ال over
أقوم بقى أطفى الفرن و أكل 😅
و خليكى فاكره
بشغل ....من غير
إنتى ست الستات❤️
BY إلى الله طَريقُنـا🤍
Share with your friend now:
tgoop.com/Giiii6/11067