tgoop.com/Jontemir/1279
Last Update:
ТАФТИШ
Ким қалбимни қорар туфроққа?
Ким қадримни кўкка кўтарар?
Тоғ қашқирин ғингшиб ҳурмоққа
Ўргатолмас итфеъл тўдалар.
"Кирланмасин ҳурлар этаги",
Сомон йўлин супуради ким.
Ўнгиб кетган ҳаёт эртагин
Янгилашга етарми илким?
Тирикликнинг онасидир субҳ,
Тунда тушдим ёрилиб қорни.
Шалвираган жасадларга руҳ
Ато этар нафасим борми?!
Борми ажал изидан чопиб,
Тутгач тепиб жойлаган қопга.
Ким Санъондек Қуръонни ёқиб,
Ботинида Худони топган?
Чимчилайди тилимни савол,
Тинглармикин ҳайқирганда ҳу-у.
Шоирини осмас қай замон?
Осмадими? Туғилмаган у.
Унда кимман? Қуртдек беқадр,
Ғижирлаган эски ароба.
Илдизим – ғам, миллатим – жабр,
Алқаб юрган юртим – хароба.
Ахир пўстим шилинишга шай,
Ахир бўйним сиртмоққа интиқ.
Мағрур кетай руҳдошларимдай,
Пешонамга ўқталинг милтиқ.
Дунё тўйган зоғу тўтига,
Арслонини кутмоқда башар.
Оғир ўзни ахлат қутига
Ташлангандек ҳис қилиб яшаш...
Ким кўнглимни кўкка кўтарар?
Ким ичимда кўрмоқчи изғиб?
Ғажинг, майли, итфеъл тўдалар,
Тўйдирайин ҳеч қурса, сизни!
Жонтемир
@Jontemir
BY Darvesh qo‘shiqlari (Jontemir)
Share with your friend now:
tgoop.com/Jontemir/1279