tgoop.com/Jontemir/1296
Last Update:
ФАРЁД
Суянган тоғларим қулади,
синди
кулгичимни кийган кўзгулар.
Ранг-баранг таскинлар бағридан қочиб
кўчага отилдим —
ижара уйим
аксириб ташлади мени тишининг
кавагида қолган жимит ушоқдай.
Тун эди,
қиёмат қўпгандай зулмат,
мийям чуқурида қамалган дажжол
довушни тилимга қўйиб юбордим:
КИММАН?
Кимман бу соялар салтанатида?!
Ўзлари жойлашган вужудлар билан
нураб тушган соҳир туйғулар.
Чопаман тахминлар оралаб —
гул бўлсам, узмаслар нечун,
ит бўлсам, юрмасдим икки оёқда,
ўлган бўлсам қаерда қабрим,
тирик бўлсам, худодай сиғинганим Сўз,
жазавамни юпатгин —
Кимман?!
Учраган симёғоч,
дарахт кавагига сепаман савол.
Хотиралар сирлашар ўриндиқларда,
умиди қуриган шаҳар бошида
кафан бичар булутлардан ой.
Совуқ тўшагида ухлар бемалол
қисматига кўнган соялар,
жазаваси сўнган соялар.
Шамолда тебранар ёлғиз тунчироқ,
осмонга қарайман,
юлдуз бу юлдуз,
қушнинг қушлигига шарт эмас исбот —
кимман?
Учаман ёввойи оқимга тушиб,
масжидга кираман (тағин соялар!)
ёнғоқ элтаман мозор қарғаларига,
ёзаман: шеърлар,
шеърлар,
эгизак шеърлар —
сўроқ билан тугайди бари!
Алаҳлаш.
Ёқамдан тутиб ўтмишга
улоқтирар хаёл — ана, бостириб
келаётир араб қўшини.
Халифа ўт қўйган кутубхонада
жон ҳолат чинқирар туркий ёзувим.
Сўнг мўғул
бойлиги таланган карвон
хунига йўқ қилар қадим давлатни
ва Темур — ҳалоскор!
Тиррақи хонлар устига
балодай ёприлар оқпошшо.
Шўрлик халқ қалбидан (яқинда топган)
Худони юлиб,
ўрнига Ленинни сайлашар — сиғин!
Яна қон!
Оҳ, Қўқон!
Содда Туркистон!
Қўққисдан ташланиб банги дашноқлар
бешикдан суғуриб олару мени
бутимни айириб ташлар тириклай!
Чинқириб ёпишган онамнинг
сўт тўла сийнасин сўйиб,
қутурган итига итқитар — ғажи!
Отамни осарлар, минглаб оталар...
Қузғунлар чўқийди душман сурати
қотиб қолган олмос кўзларин...
Воҳ, қоним — ўнлаб лойқа ирмоқлар
мажбуран қуйилган бўтана дарё.
Сиртингда ёвузлик кемаси юзар —
қасос тўлқинлари қўзғолар қачо-он?!
Сингиб кетар бўшлиққа довуш,
қўрқув сиротидан ўтолмаган руҳ
парчалари изғир атрофда.
Осмон танасига санчилган сонсиз
юлдузлар отамнинг кўзидай чақнар —
кимсан?
Уялиб ўзимни яширмоққа жой
излаб югураман тахмин оралаб.
Дарахтлар йўл тўсар сўроқ шаклида,
ариқлар, бинолар, соялар — сўроқ!
Югураман, шу югуришда
сочилиб кетсайдим Хиросимадай...
Қулади олқинди тоғларим,
Кулгичим кўчирган кўзгулар синди.
Қилич бўлсам, қинимдан чиқар,
мурда бўлсам, қабримни кўрсат,
тирик бўлсам, зулмат юзида
қиёфамни чизиб бер, чақмоқ!
Садо бермас на само, ер,
шалтоқ ғумбагидан чиқармас бошин
қисматига кўнган соялар,
жазаваси сўнган соялар.
Кимман бу соялар салтанатида?
Кимман, ахир
ким?!
Жонтемир
@Jontemir
BY Darvesh qo‘shiqlari (Jontemir)
Share with your friend now:
tgoop.com/Jontemir/1296