tgoop.com/Kholod73/2250
Last Update:
الحلفان
الحلفان عندنا ٣ حاجات:-
١. أحلف على حاجة في الحاضر.
٢. أحلف على حاجة في المستقبل.
٣. أحلف على حاجة حصلت في الماضي.
فأنواع اليمين ٣:-
١. يمين اللغو.
٢. يمين الكفَّارة.
٣. يمين الغموس.
ـ يمين اللغو (بحلف على حاجة في الحاضر) ده زي لمَّا تقولي: -
"واللَّه ما إنتِ قايمة- واللَّه لأنتِ واكلة- واللَّه ما إنتِ ماشية" ⬅️ والشَّخص اللي بتحلفي عليه قام أو ماكلش أو مشي رغم حِلفانك ⬅️ لا نُحاسب عليه "لَا يُؤَاخِذُكُم اللَّهُ بِاللَغْوِ فِي أَيْمَانِكم"..
ولكن بعض المذاهب قالت إن لو كرَّرتِ يمين اللغو ٣ مرات⬅️ عليكِ كفَّارة يمين..
طيب لو بحلف على حاجة في المستقبل (يمين الكفَّارة):-
"واللَّه ما أنا داخلة بيتها- واللَّه ما أنا مكلِّماها" ⬅️ وبعدين اضطريتِ تروحيلها أو تكلِّميها ⬅️ يبقى إنتِ كده رجعتِ في حلفانك وده اسمه "الحنْث في اليَمين"⬅️ عليكِ كفَّارة يَمين⬅️ ودي بتبقى كفَّارة على التَّرتيب..
يعني إيه كفَّارة على التَّرتيب؟
يعني هم ٤ كفَّارات، لازم أبدأ بأوِّل واحدة، لو ماعرفتش أعملها أعمل رقم ٢، لو ماعرفتش أعملها أعمل رقم ٣، لو ماعرفتش أعملها يبقى أعمل رقم ٤..
"فَكَفَارَتُه إِطْعَام عَشَرَةِ مَسَاكِين أو كِسْوَتهم أو تَحْرِير رَقَبَة، فَمَن لَم يَجِدْ فَصِيَام ثَلاثَة أيْام"..
وبالتالي لا يجوز إنِّك تصومي ٣ أيام وأنتِ قادرة تُطعمي ١٠ مساكين..
لا يجوز إنِّك تصومي ٣ أيام وأنتِ قادرة تكْسي ١٠ مساكين..
وأسهل حاجة:-
إطعام عشرة مساكين (من أوسط ما تُطعمون به أهليكم).. لأن حتى لو مش بتعرفي تطبخي أو مش هتعرفي تودِّي الأكل وماتعرفيش مقاس اللبس، يجوز إخراج القيمة..
كلمة "إطعام" يعني وجبتين، ثَمَن الوجبتين بتوعي غير ثَمَن الوحبتين بتوعك غير ثَمَن الوجبتين بتوع حد تاني..
فلو قلنا ثَمَن وجبتين مثلاً ٢٥ جنيه؛ يبقى كفارة اليمين بتاعك (١٠x٢٥= ٢٥٠ جنيه).
ممكن تطلعي ال ٢٥٠جنيه كلها في وقت واحد أو تقسَّطي الكفّارة وتطلَّعي مثلاً كل شهر ٥٠ جنية ولو قسَّطي المبلغ يبقى لازم تكتبي ورقة إن عليكِ كفَّارة يمين بقيمة مثلاً (٢٥٠ جنيه) علشان ماحدش ضامن عُمْرُه وده دَيْن عليكِ للَّه -عزَّ وجلَّ-..
طيب بالنِّسبة لكسوة المساكين، ينفع أديلهم شورت من عندي بلبسه في البيت؟ ولَّا مايوه قديم عندي؟
لازم اللبس اللي تديه للمسكين ككفَّارة يمين، لازم يكون بيغطِّي العورة، يعني يقدر يصلِّي بيه.. علشان كده تلاقي ناس في رمضان تتبرع مثلاً ب ٥ متر قماش بحيث الشَّخص ده يقدر يعمل بيه جلابية مثلاً أو لبس يكسي به عورته ويقدر يصلِّي بيه..
بالنِّسبة لتحرير رقبة، فده مش موجود دلوقتي (ده اللي كان زمان، اللي عليه كفَّارة، يشتري عَبْد ويعتقه)
فمن لم يجد بقى، يعني اللي مايقدرش يعمل أي حاجة من التلاتة اللي فاتوا (على التَّرتيب)⬅️ يصوم ثلاثة أيام..
طيب لازم يصوم التَّلات أيام ورا بعض؟
⬅️ لأ مش لازم، لكنهم فرض في رقبتِك زي قضاء رمضان..
فما تجيش واحدة تصوم اتنين وخميس وعليها كفَّارة يَمين؛ لإن مكروه التَّطوع بالصِّيام وإنتِ عليكِ قضاء أيام في رمضان أو كفّارة..
ـ يمين الغموس بقى ده إنِّك تحلفي على حاجة في الماضي، زي مثلاً:-
"واللَّه العظيم ما شُفتها" وأنتِ شُفتيها..
يمين الغموس ده خطير جدًا جدًا جدًا⬅️ اسمه كده لإنُّه بيغمس صاحبه في النَّار⬅️ وكمان مالهوش كفَّارة.. ربنا يوم القِّيامة بياخد الشَّخص ده ويغمسه في النَّار- والعياذُ باللَّه-
ويمين الغموس ده لو ترتَّب على حلفاني ضياع حقوق، زي مثلاً شهادة زور في قضية، وبعد كده ندمت واستغفرت وروحت الحج⬅️ مش كفاية، لازم ترُدِّي الحقوق لأصحابها (لأن شروط التَّوبة هيَّ:- الاستغفار، النَّدم، العزيمة على عدم الرجوع للذنب، ورد الحقوق لأصحابها لو الذَّنب ده كان فيه ضياع حقوق).
وللأسف دلوقتي في ناس بتبقى على باب المحاكم، بعض المُحامين بيدفعولهم فلوس علشان يشهدوا زور، ربنا يعافينا يا رب.
قال رسُول اللَّه -صلَّى اللَّه عليه وسلَّم-:- "ألَا أنَبِئُكُم بِأَكْبَرِ الكَبَائِر؟ قُلنَا:- بَلَى يَا رَسُولَ اللَّهِ. قَالَ:- الإشْرَاكُ بِاللَّهِ، وَعُقُوقُ الوَالِدَينِ، وكان مُتكئًا فجلس فقال:- ألَا وَقَولُ الزُّورِ وَشِهَادَةُ الزُّورِ، ألَا وَقَولُ الزُّورِ وَشِهَادَةُ الزُّورِ، فما زال يكررها حتى قلنا:- ليتَه سَكت". ( رواه البخاري ومسلم).
#دكتورة_سوزان_علمتني
#لتكون_لي_بعد_مماتي
BY خُـلود جَـمال.
Share with your friend now:
tgoop.com/Kholod73/2250