tgoop.com/Mohammed_Khalafallah/3116
Last Update:
عوداً على علمنة منظومة التعليم الحديث اللي مصممة على إنها تخرج مواطن فرداني صالح لدولة حديثة ... ما فرد مسلم مهموم بخلاص نفسه وخلاص أمته ذو رؤية توحيدية تستصحب الدنيا والآخرة:
واحدة من مفردات التعليم الحديث = إننا شايفين إنه مجال (الطب والهندسة) ده أفضل مجال خلقه الله في العلوم ...
المجتمع بينظر للمجالين ديل بمهابة .. ولمن تتقدم في العرس بينظروا ليك بمهابة .. والعائد المادي في المجالين (ممكن) يكون كبير نسبياً (هنا أنا بستثني التجارة وبتكلم عن المقارنة بين المجالات الأكاديمية الجامعية اليوم الحاصرننا فيها دي)..
بس داير أتكلم عن نقطة واحدة:
المجالات دي (خدمية) بمعنى (آلية).. ما هي مجالات إعمال فكر إنساني .. عشان كده ممكن المجتمع يكون ملان مهندسين وأطباء لكن هو مجتمع فاشل بكل المعايير ومتأخر في كل المجالات ... والأمة في ذيل الأمم
مجالات التفكير الإنساني هي بصورة أساسية تتمحور حول العلوم البتتناول الهوية والدين واللغة والثقافة والتاريخ والسياسة والاجتماع ...إلخ دي المجالات البتصنع الإنسان واللي مفترض يكون وزنها النسبي في المجتمع كبير جدا لأنه دي النقطة الممكن تغير المجتمعات وعجلة التاريخ وتنقل الأمة فعلا نقلة جبارة..
وبالمناسبة المجالات الخدمية دي عادي جدا يتم فيها الاستبدال بأي شخص بغض النظر عن فكره وأيدولوجيته .. يعني عادي ممكن كبري تعمله ليك شركة هندوسية أو بوذية أو نصرانية .. لكن المجال الإنساني ما حيقدمه ليك إلا صاحب آيدولوجيا موافقة ليك .. يعني ما ممكن قانونك وتاريخك وهويتك ودينك مثلاً ينظر ليك فيه غير شخص ذو رؤية مسلمة ...
ودي برجعنا لسؤال فلسفة العلم: لماذا نتعلم وكيف نتعلم وماذا نتعلم؟
الإجابة بتاعت التعليم الحديث اليوم ما هي الإجابة الافتراضية بتاعتك إنت في الإسلام .. وهي إنه العلم مفترض يكون لتحقيق العبودية واستخلاف الأرض ...
لالا الإجابة هنا مادية محضة ما بتستحضر البعد الأخروي والهم بتاع الأمة والرابط الدينية والتاريخية والهوية وكده ..
عشان كده الفقهاء لما تكلموا عن العلوم الدنيوية النافعة بيقولوا: فرض كفائي تعلمها .. يعني يقوم به من يكفي الأمة..
يعني الواحد ما بمشي يحشر الأمة كلها في الطب والهندسة ويخلي البلداء في المجالات التانية ... وفي مجالات ممكن ما يخلي ليها ناس أساساً ...
فعليا نحن الواحد لما يفشل في المدرسة بيودوه الخلوة وأصول الدين .. نظام فاكرين إنه دي علوم الفاشلين البليدين ..
وده جهل محض ذات طبيعة العلوم الشرعية ... والله العلوم الشرعية دي من أعسر ما يكون ... وتحتاج لأذكياء الأمة عشان يعملوا فيها نقلات حقيقية ... وده المشاهد من عباقرة الإسلام زي الشافعي وابن تيمية وابن حزم والشاطبي وغيرهم .. دايماً الذكي بيعمل نقلة في العلوم دي كبيرة جدا ممكن تُبنى دول كاملة على مفاهيم نتاجه وفكره .. ومثلها العلوم الإنسانية وزي مثلا ابن خلدون والقيمة القدمها في علم الاجتماع وهكذا ...
وده سبب جوهري مخلي الأمة ضعيفة فكرياً شديد .... وياهو بتبلع في الرؤية الغربية لأنها جاهزة قدامها .. بينما بالمقابل المجالات الإنسانية دي الآن في الغرب من أخصب المجالات وبتنصرف فيها ميزانيات دول ومراكز بحثية وغيرها .. عشان كده منظومتهم السياسية والحقوقية والاقتصادية متماسكة تقنياً (ما أخلاقياً )...
العلم في الإسلام مرتبط بالله "اقرأ باسم ربك الذي خلق".. موش مجرد مجموعة معلومات شايلها في راسك وماشي بيها .. شوف فلسفة العلم ده شنو .. ومدى توافقه مع فكرك شنو .. وهل حقق ليك غاية العبودية ولا لأ؟
ده هو المحرك البخلي الناس ممكن يقدموا مخرجات التعليم دي على أسس جوهرية في حياة المسلم زي الأسرة والزواج والتربية والأمومة ...
BY قناة | محمد خلف الله
Share with your friend now:
tgoop.com/Mohammed_Khalafallah/3116