tgoop.com/Nozima_Habibullayeva/535
Last Update:
* * *
Мени тушунмаслар,
Оловга чўкиб,
сувда ёнмаганлар тушунмас мени.
Бир япроқ узилса,
изтироб чекиб,
Куздан тонмаганлар тушунмас мени.
Не билсин,
денгизни қилганча орзу,
Жилғалар бўйида йиғламоқ — роҳат.
Кўзларинг ёмғирга тутса тарози,
Томирингга қайтса алвон ҳарорат.
Бунда мезон билан рақс тушиш мумкин,
Жонланар тошларнинг қадим луғати.
Мени англамаслар кулиши мумкин —
Кулгулари кулранг кунлар туғади.
Мен эса тушунмам, волаларига,
Емишлар ҳақида гапирса жўшиб.
Уялмай ўргатар болаларига
Юртин талаганлар тилида қўшиқ.
Мақтаниб фарангий атирлар билан
Райҳонлар бўйидан ўтар бенасиб.
Нонин бўлишмас-у, фақирлар билан,
Кўз-кўзлаб ўтади бўлиқ сийнасин.
Руҳи шафақларга этмаган парвоз,
Не билсин,
ақчадан қанот бичганлар.
Қўлларида тасбеҳ,
нафслари ғаввос,
Бисмилло деб шомда шароб ичганлар.
Англашга уннайман,
шимараман енг,
Аммо саволларнинг пироварди йўқ.
Наҳот, Кўҳна Турон авлодларининг
Энди қўшхотиндан бўлак дарди йўқ.
Якдил бўлса дейман жами одамзот,
Бесамар кетмаса тариқдай кунлар.
Нигоҳлар покиза,
руҳ бўлсин озод,
Майдонга тушмасин буқаламунлар.
__
@Nozima_Habibullayeva
BY Нозима ҲАБИБУЛЛАЕВА
Share with your friend now:
tgoop.com/Nozima_Habibullayeva/535