tgoop.com/Rojhalati_kurdistan1324/36699
Last Update:
نیشتمان
نیشتمانم!
ئەی ئەندازیاری دەروونی پڕ لە تاسەم
ئەی نمەی بارانی سارای دڵی تینووم، پێناسەم
ڕووناکی و سۆمای چاوانم تۆی
کۆنەهەواری دڵخۆشیی باوانم تۆی
لەهەر کوێ دوور لە تۆ بژیم باش دەزانم،
غەریب و بێ ناونیشانم
نیشتمانم
پاڵگە و پاڵپشتی هەرمانم،
لوتکەی بەرزی کێوەکانت
ساکەدەشتی بێپایانت
ئەستێرەی گەشی ئاسمانت
هێز و هیوان بۆ دەمی لەخەم ڕەخسانم
نیشتمانم!
زێدی ئاڵتوونیی گوورانم
بەهارم دی!
بەری ڕەزبەرم چنیەوە،
بەرەو کەشی خەزەڵوەرم
بەڵام تا چاوم لە تۆ بێ،
سەرم بەرزە و سەرداری بێ ڕکابەرم
نیشتمانم!
ڕۆح و گیانم!
پێغەمبەر نیم بەودیو بستووی ژین بزانم
بەڵام لێرە، تا بەرەو گۆڕ شۆڕ دەبمەوە
ناوت لەدڵ ناسڕمەوە، سوێندم بە ناوی یەزدانم
نیشتمانم
تابلۆی سازگاری ڕەوانم
سنووری سوجدەی توانەوە
بۆ غەیری خوا نابەزێنم
بەڵام پەیمانی ئەمەگ و وەفاداری لە ئاستی تۆ ناپسێنم
نیشتمانم
دەلاقەی ئاسۆی هەرمانم
من لەمێژە چاوی دڵم بۆ جوانیی تۆ دادڕیوە
ئەو سەردەمەی کاڵنەکوڵیۆ بووم، تێپەڕیوە
سەرچاوەی بیرم تەقیوە،
چاک دەزانم نیشتمانم
تا پێش ئەوەی تۆم نەناسی
هاوڕێی من بوون تاسی و کاسی
نیشتمانم
قوبەی شانازیی سەرشانم،
ئەرخەیانم!
ئەرخەیانم!
ئاڵان بە باڵای پیرۆزت
زایەڵەی حەیرانی ڕەسەن و بەسۆزت
جڵەوی ئاواتەکانمی داوەتە دەستم
ڕەوڕەوی تێگەیشتنی وەڕێ خستم
نیشتمانم
عیلاجی ناخی پڕژانم
هەرچەند ڕووکاری ژیانم دایمە خەمە و خێر نەدیوە،
خۆشیم تەنیا وەکوو پاشکار هەڵچنیوە؛
کە چی هەر دەم، چاوی چاوەڕوانی پڕووش و پڕاوم، لە پێشکەوتنت بڕیوە
نیشتمانم
زنەی باوەڕ و ئیمانم
دڵنیا بە، داری تەمەن دەیان سەدەش تێپەڕێنێ،
ملوانکەی خۆشەویستی تۆم لە مل دایە و دڵم بۆ خۆشەویستیی تۆ دەکورکێنێ
#حەسەن_ڕەوش(پارێزەر)
کاناڵی کوردستان
❤️🦋💫💫
@Rojhalati_kurdistan1324
BY کوردستان / Kurdistan
Share with your friend now:
tgoop.com/Rojhalati_kurdistan1324/36699