Шеър айтсак – гул қизлар шошилиб қолса,
Паноҳ истаб кўзлар шошилиб қолса.
Оҳ, ўша кўзларнинг тубига чўккан –
Тегманозик ҳислар шошилиб қолса.

Кўприк ости хавфли турма, дейдилар,
Киприк усти хавфли юрма, дейдилар,
Қўрқмайин шеър айтсак даврада агар –
Юзлаб лабу юзлар шошилиб қолса.

Қўшиқ эшитимли нақоратидан,
Айланай шоирлар маҳоратидан,
Сел бўлиб сўзларнинг ҳароратидан –
Пешонада тузлар шошилиб қолса.

Ўқийверсанг – тоғлар кетса сесканиб,
Юраклардан доғлар кетса сесканиб,
Чидолмайин боғлар кетса сесканиб –
Райҳону ялпизлар шошилиб қолса...

П/с: Куни кеча Ўзбекистон техник жиҳатдан тартибга солиш агентлигида биз шоирлар билан режалаштирилган ижодий учрашув жуда самимий руҳда ва юқори савияда ташкил этилди.

Фурсатдан фойдаланиб, ташаббускор Агентлик раҳбарияти ҳамда мутасаддилари, хусусан, Наибахон Азизходжаева Мамадалиева ва ёнимизда бўлган барча яхшиларга чуқур миннатдорчиликни изҳор қиламиз!

@Rustam_MIRVOKHID