tgoop.com/Sevgidanizi1/3597
Last Update:
▫️او قیز هارا گئتدی بیزیم شهردن؟!
بیز کنددن کؤچنده آرخامجا دوشوب
یاری یولدا آزمیش اؤز ایتیم کیمی
آتاسین، آناسین، ائوین-ائشیین
هر شئیین ایتیرمیش بیر یئتیم کیمی
پریشان دولاندیم کوچه‌لرده من
او قیز هارا گئتدی بیزیم شهردن؟!
شهردن کاناردا ساکیت بیر آدا
نئجه ده گؤزل‌دیر یاشیللیق سودا
سریلمیش خالچاسی، خالی‌سی، گؤی اوت
تاوانی آغاران، قارالان بولود...
آی پالید نه اولدو وئردییین اؤیود؟!
دئ قالدیر باشینی آ سالخیم سؤیود
داراشان نه درددی ساچینا دن-دن
او قیز هارا گئتدی بیزیم شهردن؟!
آدامی گؤرنده لولله‌نیب دوران
اوزونه، گؤزونه زیلله‌نیب دوران
بوشونا هوروشن آ قورخاق ایت‌لر
یاتاغان آیی‌لار، یاپالاق ایت‌لر
شهرده بیر چؤپو قورومادینیز
ایت اولدو، "قورد" اولدو فقط آدینیز
بو دردلی شهرین چیخاجاغیندا
غربته اوزانان یولون آغیندا
یئنه سومسونورسوز ائله سحردن
او قیز هارا گئتدی بیزیم شهردن؟!
آیریلیق پاییزدیر باهاری گلمز
چیچه‌یی آچیلماز، چیچه‌یی گولمز
قبریستان یولودو آیریلیق یولو
نه آیریجی، نه هاچاسی، نه قولو
بو یول هئی آپارار گئری گؤتورمز
بو یول اوت بیتیرر، آدام بیتیرمز
اوتوروب بو یولدا ها گؤزله‌یرسن
لاپ ائله ایندیجه گلر دئییرسن
فیکیره دالارسان فیکیرلر یاغی
دنله‌یر بئینینی سئرچه فیکیرلر
بیر فیکیر قوواسی بیر داشین اولماز
آغلاماق ایسترسن گؤز یاشین اولماز
بوغولوب اؤلرسن ائله قهردن
او قیز هارا گئتدی بیزیم شهردن؟!
او کی قلبی تمیز، روحو تمیزدی...
ایلاهی گؤزلری دورو دنیزدی...
چیچک اورییمی اونا وئرمه‌میش
هله قوپارمامیش، هله درمه‌میش
گؤزل‌لر "جینگیلیم چووا" دوشدولر
ائله بیل اوووجومو اییله‌میشدیلر...
منیم اللریمی تئز اوخودولار
گیردیلر مین دوندان-دونا گؤزل‌لر
تله‌می قوردولار؟ تور توخودولار؟
قیسقانج‌می چیخدیلار اونا گؤزل‌لر؟
خبریم اولمادی نییه خبردن؟
او قیز هارا گئتدی بیزیم شهردن؟
او گوندن قلم ده کاغیذا یاتمیر
حیسسیمی، دویغومو هئچ نه اویاتمیر
هر گون، هر گئجه
عزیز قوناغیدی منیم شعیریمین
سویو گؤزلریندن ایچردی شعیریم
ایلهام قایناغیدی منیم شعیریمین
اوندان ایلهام آلیب یازیردیم هردن
او قیز هارا گئتدی بیزیم شهردن؟!
#توحید_نامور_آدلیم
@Sevgidanizi1
BY sevgi dənizi
Share with your friend now:
tgoop.com/Sevgidanizi1/3597