tgoop.com/Xaled_Avyndar/40
Last Update:
. خەو و خەیاڵ
ژیانی من پەژارەیە و...
کەلە رێژە لی ژان و وەی
ئاواتمە هەر نەبێ جارێک
پر بە دڵم بڵێم ئۆ خەی
خەمەکانم گەلێک بە سۆن
کەس نەیدیون لە وانەی من
دەمێک ناسرەون دراوسێم
لە بەر شینی شەوانەی من
ئەوا ئەمشۆش لە دوو چاوم
تـۆراوە خـەو، بـە تـەنـیـایـی
وەک تارمایی، بە کــۆمە کۆم
دەخوشم بۆ دەر، بە ئەسپایی
نە خــشپەیە، نە چــرپەیە
دنیایەکی مات و بێ دەنگ
خامۆشە شار، داوەستاوە
بێ دەنگی چەشنی گۆمی مەنگ
مانگ لە سوێ را هێدی هێدی
دەکشێ بەرەو سینگی ئاسمان
رێبوارێکە و زۆری دیون...
لە وانەی وا سینگیان سمان
ئەستێرە وەک ئەڵماسی روت
پێ دەکەنن رو بە روی مانگ
لەگەڵیان بێدارم، هەتا
مەلای خەواڵوو دەدا بانگ؛
لە ژێر تریفەی مانگە شەو
لە بەر بێڵایە، کاس و وڕ
دێمو دەچم،، بە پێدزە
شەکەت، هەناسە سوار، دڵ پر
بیرم شاشە و مێشکم ئاڵۆز
دژ و پەشۆکاو و پەستم
دوای چەند هەنگاو، جار نا جارێک
چاو بە ئەسرین؛ رادەوەستم:
را دەمێنم دادەمێنم، ئۆقرە ناگرم
گری گرتووە دەروونی من
ئاسۆی هومێدم تاریکەو...
قەڵای هیوام بووە سەرەو بن
پەناو پەسیوی سانەوەم
ئامێزو باوەشی تۆیە
رێگام نادەن دووراودووریش...؛
چاوم لێی بێ ،... ئیتر بۆیە؛
خەوم نایەو خەیاڵ دەمبا...
دەمبا، بەرەو مەڵبەندی دوور
لە زۆر ئاسۆ سەرنج دەدەم
نابینم تارای بووکی سوور
وێڵم بە دوای نادیارێک....
وەکو شێتان دەکەومە دووت
کرنۆش دەبەم بۆئەوشوێنەی
خونچەی دەمی تۆی لێپشکووت
دەرۆم، دەگـرێـم، دەلـەرزم؛
دەترسم لە دەهۆی بەد کار
دڵم تەنگە و دۆش داماوم
لە داخی مەینەتی رۆژگار
دێم هەتا بەر دەرکی ماڵێ
چاوەرێمە چاو کاڵەکەم:
بە گرمەی تۆپێکی لە پر
دەپسێ هەودای خەیاڵەکەم
ئارەقـــەیکــی ساردو سر
دەنیشێتە سەر لەشی من
بە خۆم نیە هەڵدەرژێن ئەمجار
فرمێسکی ئاڵ و گەشی من
ئای... لە چەنگ ئەم هەموو خەمە!!!
وای ...لە دەس بەدکاری بێ خێر
نایەڵن گەر بە خەیاڵیش...!
لە باوەشت گرم: تێر تێر
نێوانمان زۆرە، دوورین لێک!؛
من ئا لێرەم و تۆ لەوێ
دەروەست نیم گەر دڵنیا بم
ناوم لە دڵتا دەسرەوێ.
زۆر لەمێژە کە پێم وتووی؛
ژینم دەگەڵ بزەت جووتە
وەبەسرێ با؛ "گیانی یاخیم":
مەبرەلێم ئەو تاکە قووتە.
ــــــــــــــــــــــــــــــــــــ
۱۳٦٤ ی هەتاوی
ــــــــــــــــــــــــــــــــــــــــــــ
شاعیر: خالید ئەویندار
@Xaled_Avyndar
BY خالید ئەویندار
Share with your friend now:
tgoop.com/Xaled_Avyndar/40