tgoop.com/Xaled_Avyndar/73
Last Update:
فتوا
قاوەڵتوونی «قوربان»یە و
قاقا و قریوەی مناڵە و...
قانەقدیلەی جێژنەیە،
لە قەدیمی زەمانەوە «قەڵا» قافڵەی بەرێوەیە ؛
لە دیرۆکا...
لە تۆماری تەمەن درێژی چیرۆکا ،
ھا... وەخوێنە دێڕ بە دێڕ... لاپەڕ لاپەڕە :
رێناسێکە و رێگای «برایم»ی گرتووە و
دژی بڕوا و فڕوفێڵی بێ باوەڕی لالەوەڕە ،
لە «مزگت» و «کڵێسە» و «دێر»ەکانی دا ،
چەمیون سەر بۆ «سمایل» و رێز بۆ بەرزی «یەزدان»ی یە و
دیارە دیاریش بزەی شیرنە لە «مەزدا» وە و
ھەقەپەڵەی خێروبێری بە خوڕەمە و دابارینی حەز و ھیوای بە رێژنەیە .
وا لەو ساتەی «ئاھوورایی»...
وای... ئا لەم رۆژەی پڕ لە کەیف و بەزم و شایی ،
بە «قانوون»ی قێزەونی «قەمە» و «قەنارە» و «قات وقڕ» ،
بە «زاکوون»ی «قفڵ» و «قەدارە»و «قڵت وبڕ» ،
بە رەسمی «ئەنفال» و «تەعریب» ،
بە دابی «ئەشکەنجە» و «تەعزیب» ،
بە رێوشوێنی دڵرەنجێنی «عەبد» و «جاریە» و «ناندێ دڕ» ،
بە ئەمری «مورشید»، «دارۆغە» و «ئەمیر» :
جێژنیان رفاند ، دزیان بزە و قڕیان کردین،
بڕیان سەری «خۆزگە و ھیوا» و
پڕیان کردین ؛
لە «نفرەت» و «تۆڵە»ی نابەرزەفڕی سارد و سڕ ،
بە «فەرمان»ی نەزۆکانەی شڕودڕی «شەوپەرەست»ی لە خۆ بایی.
نیشتمانە دابەشەکەی جێژنە دزراوی کڵۆڵم !!...
سەر ھەڵبڕە...سەرھەڵبڕە :
«خوازەڵۆک»ی نوور نەدیوی «قڕخەمەرەس»،
دەستی رەشە، بیری گڵاو ، دڵی سڕە .
تا سڕینی ھەرچی «رەشی» و «بێنووری»یە
لە ئێستاوە ، بە فتوای من
تا ئەو دەمت «جێژن» نیە،
داپیرەکەی جەرگ سووتاوی کۆستکەوتوی دژە «زۆڵ»م .
دامەمێنە
ئەو «نەبوون»یەت پتر مایەی «روسووری»یە .
ــــــــــــــــــــــــــــــــــــــــــــ
شاعیر: خالید ئەویندار
@Xaled_Avyndar
BY خالید ئەویندار
Share with your friend now:
tgoop.com/Xaled_Avyndar/73