tgoop.com/adela313/5609
Last Update:
ولينه ابلا ذنب مسجون
وابحاله شمت هارون
من شوف الأهل محروم
ياوسفه رحل مسموم
ابن جعفر… ابن جعفر
---
ولينه غربته ابسجنه ..واتعذب اويلي ادهور
وحيد اوما إله سلوه.. ولا واحد يجي له ايزور
ماينظر ضوا ابعينه ..لأن حتى الضوا مأسور
وانفاسه خنگها الضيم..اودليله ابكل وكت مجمور
..
اوسجانه بلا رحمه
ابسلاسل گيّده جسمه
من ضيم السجن مهموم
ياوسفه رحل مسموم
ابن جعفر… ابن جعفر
---
من ثگل الحديد اعليه..ظل ينزف ألم واجروح
مايگوه على النهضه.. لنه امن الضرب مطروح
يرفسونه العدا لنجاس..اوكل حايط عليه اينوح
مصابه يفجع الأملاك.. اوعلى حاله تموت الروح
اذا صلى ابمصلاته
يدعي اويجري عبراته
يدعي والگلب مالوم
ياوسفه رحل مسموم
ابن جعفر… ابن جعفر
---
نقرا سيرة الكاظم..اوإله نجري دموع العين
اونذكر حسرته اوحاله..اومانگطع أبد لونين
سوط الـ ألّمه، گبله..سوط امألم اخت احسين
اوخد اللي انصفع منه..خد مكسورة الضلعين
مصابه ايشابه اجداده
اوچنها أصبحت عاده
منه اشگد تفيض ادموم
ياوسفه رحل مسموم
ابن جعفر… ابن جعفر
---
ابطامورة ظلام ايصير..عجبه والجسد ذبلان
مايگدر يمد رجليه..مرضوضه من السجان
لله يشتكي وضعه.. اوگلبه ممتلي اشجان
اولو مره يشوف الماي ..يذكر جده العطشان
تاليها الأجل وافاه
بعد ماكابد امن اعداه
اوصاحت شيعته ابهاليوم
ياوسفه رحل مسموم
ابن جعفر… ابن جعفر
---
حطوا نعشه الطاهر..ياويلي ابجسر بغداد
والشيعه صفت زحمه..واجت له ابكل كتر وفاد
واجه واحد يصيح ابصوت ..شيعو علة الايجاد
هذا ابلاذنب مسموم.. انمرد چبده مع لفاد
شالو اجنازته ابحسره
اوكلها تهمل العبره
تصرخ والدمع مسجوم
ياوسفه رحل مسموم
ابن جعفر… ابن جعفر
---
عادل العبد الله
7/3/2021
رحم الله من قرأ سورة الفاتحة واهداها لروح الوالدة آمنه العبد الله
https://www.tgoop.com/adela313
BY الشاعر عادل العبد الله
Share with your friend now:
tgoop.com/adela313/5609