tgoop.com/alshaherh/1848
Last Update:
يا خويه يا خويه يابوعلي يا خويه
--------------------------------------------
هلي يهل المحنه ما تسمعوني
گومو من المنيه لبيتي ودوني
فوگ الناگه اروحن لا تخلوني
لو يمكم اظلن لو تودعوني
حيره خويه حسين حيره
بت علي وأمشي أسيره
والله يبن أمي چبيره
لا كفيل ولا عشيره
يا خويه يا خويه يابوعلي يا خويه
------------------------------------------
على ظهور النياگ وشمر والينه
نودعكم بعد ياهو اليخلينه
ذبح نحر الحسين النوب سابينه
صطر طفله اعله خدهه وسب اهالينه
وين خويه نروح منه
بيده صوطه وما رحمنه
من الالم وسفه وگعنه
ياهو خويه اليفزع النه
يا خويه يا خويه يابوعلي يا خويه
-----------------------------------------
بلا خيمات هسه ونركض بصحره
اليشرد صوط فوگه والجمر حدره
علامه بخد طفل واصياط البظهره
وهوه ايصيح وينچ جده يا زهره
بلا ذنب شمسوي آني
يا عطشهم موتاني
والجمر بالطف چواني
اركض ومحد حماني
يا خويه يا خويه يابوعلي يا خويه
-----------------------------------------
يشدون السبايه بحبل ترضاهه
لو طاحت يتيمه انطيح وياهه
تالي أم الخدر لعداك ممشاهه
يبن أمي الدهر للضيم وداهه
محد ايحامي علينه
گبال اهلنه وانولينه
گومو يحسين ابتلينه
كلنه مشدودات ادينه
يا خويه يا خويه يابوعلي يا خويه
-----------------------------------------
الف يا حيف زينب وآنه علويه
يگلولي كفيلچ وين ؟ مسبيه !!
تشب نار الهواشم والزعل بيه
واباوع للنهر وأچفوفه مرميه
ها صحت عباس وينك
شيل چفك وين عينك
يا گمر طاحت يمينك
خويه محتاج اليعينك
يا خويه يا خويه يابوعلي يا خويه
كلمات الخادم / رعد الفريجي
محرم الحرام 1446 للهجره
ثوابها الى روح والدتي
BY خادم الحسين رعد الفريجي
Share with your friend now:
tgoop.com/alshaherh/1848