tgoop.com/alshaherh/1856
Last Update:
جيت شچايه الهلي بالهيمه
يبن أمي دگعد طاحت الكم خيمه
يابو الفضل يابو الفضل
--------------------------------------------
يمسكت حلوگ الزلم يمخورس الرمايه
گوم اعله حيلك يلأخو بالگاع هاي الرايه
عباس مو وكت النهر ما ردنه نشرب مايه
چلمة سبيه من انحچت كتلتني موش حچايه
طبو خيمكم عباس
ركضن حرمكم عباس
بلوه ابتلينه عباس
خويه انولينه عباس
يا ضيم گلبي ألما أوصف ضيمه
يبن أمي دگعد طاحت الكم خيمه
يابو الفضل يابو الفضل
-----------------------------------------
عباس نركض والرمل حار ويچوي اعيالك
والشامت بچفه الحبل هذا الحچي چتالك
يبن امي رد اعله الخدر وأحميهه تبچي اطفالك
عباس بس گاع الحرب يبن الولي تحلالك
عيني ونظرهه ،، عباس
تقبل شمرهه ،، عباس
يحدي بضعنه ،، عباس
ردنه الوطنه ، عباس
تانيت طولك الله كون أيديمه
يبن أمي دگعد طاحت الكم خيمه
يابو الفضل يابو الفضل
-------------------------------------------
جيناك خويه اعله النهر مو ماي ردنه العونه
يا حاضر الشده المدد يابو الفضل وصلونه
وينك يسبع الگنطره وداعت علي أذونه
ذبحونه بالسب والشتم يا ريتهم ذبحونه
بالطف ركضنه ،، عباس
يمك وصلنه ،، عباس
طاحت چفوفك ،، عباس
ما باقي شوفك ،، عباس
گوم يا بو الزود يابو الشيمه
يبن أمي دگعد طاحت الكم خيمه
يابو الفضل يابو الفضل
----------------------------------------
وين الهواشم علترب محتاجه هسه اخواني
غير انه بت حيدر علي وام الحسن عنواني
عباس تسمع يلأخو مديت الك ذرعاني
ترضاهه بحبال انچتف ترضاهه ما تلگاني
أمشي أسيره ،، عباس
هاي الچبيره ،، عباس
ضعن الهواشم ،، عباس
ما يبقى ىسالم ،، عباس
والضعن بچفوف العده تسليمه
يبن أمي دگعد طاحت الكم خيمه
يابو الفضل يابو الفضل
-----------------------------------------
ماشين خويه اعله الهزل يمكم ولا ظلينه
عباس يا حادي الضعن هسه الشمر حادينه
معقوله يبن المرتضى بين العدى اتخلينه
گوم اعله حيلك يلأخو عباس بس حاچينه
هسه افترگنه ،، عباس
رايح ضعنه ،، عباس
منكم مشينه ،، عباس
مچتوفه ادينه ،، عباس
نمشي وي وادم مالهم كل قيمه
يبن أمي دگعد طاحت الكم خيمه
يابو الفضل يابو الفضل
كلمات الخادم / رعد الفريجي
محرم الحرام / 1446 للهجره
ثوابها الى روح والدتي
BY خادم الحسين رعد الفريجي
Share with your friend now:
tgoop.com/alshaherh/1856