tgoop.com/alshaherh/1860
Last Update:
هذا الرمح ذابحنه لتشيلونه
گبال الحرم يا ناس لترفعونه
هاي المناحه اعله الهزل
المذبوح باوع علحبل
------------------------
راس برمح - جرح بجرح
عين الحرم - عل المنذبح
جابو هزل - سوط وحبل
وين الولي - ماظن عدل
زينب بت علي الما شافو خيالي
الف يا حيف اروحن ويه چتالي
على ظهور النياگ وما يصح والي
وراس حسين فوگ اعله الرمح عالي
بعيد شلون ألوحنه
أريد أبن أمي اشمنه
خلونه كلنه وياه بس خلونه
گبال الحرم يا ناس لترفعونه
هاي المناحه اعله الهزل
المذبوح باوع علحبل
------------------------------------
هذا الولي ،، باوع ألي
بيدي الحبل ،، ها يا علي
مدري شقره ؟ ،، لمن درى
لحال الحرم ،، منحر جرى
هذني دموعه سالت والرمح جابه
وصل يمي الحنين بدمه وترابه
اباوعله وأصيح حسين يا يابه
هلا يا باب ربنه الما يسد بابه
دم امخضب الشيبه
الي ياهوه اليجيبه
خلوه بحظني وخل اشوف عيونه
گبال الحرم يا ناس لترفعونه
هاي المناحه اعله الهزل
المذبوح باوع علحبل
-------------------------------------------
غربه وآسر ،، سوط وزجر
مات الوالي ،، وباقي الشمر
هزله وشمس ،، شتم ورفس
بنص الحرب ،، ياهو اليحس ؟
نمد چفوفنه الوالينه ما لحناه
بعيد اعله الرمح بس ردنه نحچي وياه
يحرگون بگلبنه وصحنه كلنه هناه
ها يحسين باوع علخدر ويلاه
بنتك وسفه صطروهه
زينب خويه يسبوهه
ذبحونه كلنه وي الولي ذبحونه
گبال الحرم يا ناس لترفعونه
هاي المناحه اعله الهزل
المذبوح باوع علحبل
-----------------------------------
هالقافله ،، بطف كربله
هذا السفر ،، ما نحمله
عفنه الگمر ،، يم النهر
هاي الهزل ،، هذا الدهر
صعب تترك هلك وتماشي ذباحك
يحداي الضعن لا شفنه مصباحك
هاي ايتام حيل اتغثهم إجراحك
مو حمل السياط وصطرت ارماحك
هذا الطاح واليعثر
وهذا من الگفى ينجر
وهذا ابحوافر خيل ويسحگونه
گبال الحرم يا ناس لترفعونه
هاي المناحه اعله الهزل
المذبوح باوع علحبل
-----------------------------------------
صارت صدگ ،، اي نفترگ
من الاهل ،، بيه الحرگ
ما وَدعِت ،، لا لا متت
مات الگلب ،، من سلمت
يحسين السبايه بلا أهل كلفه
يمشي وي الوضيع الشرف والعفه
يگلولي انسبيتو وگلت يا وسفه
وكت خلى الخدم بالساده تتشفى
وكت خلاكم ويانه
وظلت جثث موتانه
بس لا وحق حيدر ولا تنهونه
گبال الحرم يا ناس لترفعونه
هاي المناحه اعله الهزل
المذبوح باوع علحبل
كلمات الخادم / رعد الفريجي
محرم الحرام 1446 للهجره
ثوابها الى روح والدتي
BY خادم الحسين رعد الفريجي
Share with your friend now:
tgoop.com/alshaherh/1860