tgoop.com/alshaherh/1887
Last Update:
هاليوم يوم العباس نشلع صدرنه الليله
---------------------------------------------
الليله يا عالم ثگيله الليله
الليله مخصوصه لكفيل العيله
الغتره تبچيله و تنوح الشيله
ماهو منا الما يدگ بحيله
علتراب ينام خده
شده بلعباس شده
ايده ماكو بطرگ زنده
بلوه هايه ،، ما كو رايه
ياهو اليحامي العبايه
لا چفوف ولا جربته
يا اللهي اتعين اخته
يا ظهر تدري الكسرته
يا گمرنه ،، اگعد النه
وين چفك يفزعلنه
جاب الخبر وجه حسين والنهر ماخذ حيله
هاليوم يوم العباس نشلع صدرنه الليله
-----------------------------------------
السابع الماخذ عمرنه وروحنه
بطيحت العباس زايد نوحنه
زغار والسابع سبب لجروحنه
ويلي يلعباس يا مذبوحنه
ضعنه يا عباس چلمه
والحچاهه شلون زلمه
حسين بيده آثار دمه
صاح اخونه ،، فارگونه
يا عزيز ابگلب ابونه
شنهي نايم وانه يمك
انت ميت وانه اشمك
فرهدوك شلون ألمك
يا كشختي ،، وكافل اختي
شو صرت خويه كسرتي
يابو الفضل يلخيال ها يلترد العيله
هاليوم يوم العباس نشلع صدرنه الليله
------------------------------------------
بمجلس العباس نرفع رايه
نكتب اعليهه الگمرنه حچايه
هذا واحد ما تبدل رايه
هذا سوى ابكربلاء أسوايه
هذا يسوى هواي يسوى
والحسين ايگله فدوه
الخوه بس وياه خوه
ما نعرفه ،، موته وسفه
علتراب ايطيح چفه
طايح اليگضي الشدايد
دمه فوگ عيونه جامد
راح من حسين قائد
محني ظهره ،، من يجبره
كسره بالعباس كسره
طاح العمد يا هلناس حتى الخيم تبچيله
هاليوم يوم العباس نشلع صدرنه الليله
------------------------------------------
يله خلي إنوح نلطم روسنه
طاح هيبتنه الگمر ناموسنه
هالعزاء صاير چبير دروسنه
ليلة العباس كل قاموسنه
بيهه نتعلم نوافي
والدليل ايصير صافي
شافي يلعباس شافي
بابه باقي ،، چفه ساقي
هوه قائدنه العراقي
يا حلاتك وانته دامي
يا غلاتك يا أمامي
اسمك امحلي الاسامي
بالمجالس ،، يمنه جالس
شذره يا تاج المحابس
لو صحنه ها يلكفال كل همنه راح ايزيله
هاليوم يوم العباس نشلع صدرنه الليله
------------------------------------------
هذا يوم الهيبه شيخ القاده
ياهو منكم عنده حاجه وراده
يله بسم الله يحچي امراده
تگضي بأذن الباري يم الساده
والدعاء بچفوف كافل
يصعد لاعلى المنازل
والنعم من ابو فاضل
ما يردنه ،، هوه عدنه
طحنه بس لا ما يهدنه
نعمه عباس و مناره
حتى باوقات الزياره
نشعر بهيبة وقاره
من نصيحه ،، من ضريحه
يشفى الارواح الجريحه
ما تبطي حاجات الناس وايد الخلگ توميله
هاليوم يوم العباس نشلع صدرنه الليله
كلمات الخادم / رعد الفريجي
22 / ذو الحجه / 1445
ثوابها الى روح والدتي
BY خادم الحسين رعد الفريجي
Share with your friend now:
tgoop.com/alshaherh/1887