tgoop.com/amhejran12345/17747
Last Update:
نعي لأستشهاد الأمام الكاظم عليه السلام
ياهو العدل راس الشفيه
وكت المنازع والمنيه
ولاولد يمه ولابنيه
لاولد يمه ولابنيات
واجروح البجسمه وسيعات
غمص عيونه وبالسجن مات
غمص عيونه ومات وحده
وابعاد مايدرون ولده
يالسندي خايب شلك عنده
يالسندي خايب لاتضربه
فك السجن واميه شربه
وخل الهوه يدخل الگلبه
خل الهوه يترس وريده
مسموم والونه شديده
فك السلاسل وافتح ايده
فك السلاسل وافتح الباب
وخلي الغريب ايشم هوه الهاب
دمه يصب والمتن ماطاب
متنه انهشم ويسيل دمه
گلبك صخر مابيك رحمه
امنين الهوه ايلوحه ويشمه
الهوه امنين يلوح صدره
بالسجن گضه اسنين عمره
وحديدكم متنه يحفره
شگ الجلد والعظم جاسه
ومحد دخله وعدل راسه
وعالباب خليتوا حراسه
اباب السجن وكفوا الحراس
ممنوع گالو توصله الناس
ومنين اجيب البطل عباس
امنين اجيبنك يجيدوم
تكسر الباب ويومك اليوم
وبيدك اتشيل المات مسموم
تشيله اعله راسك مو بيمناك
الهاي ياعباس ردناك
اليوم انچتل واحد امن اعضاك
✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر
https://www.tgoop.com/amhejran12345
BY الشاعرة الملة ام هجران العمارچيه
Share with your friend now:
tgoop.com/amhejran12345/17747