tgoop.com/amhejran12345/17766
Last Update:
لطمية للامام الحسين عليه السلام وفقدان الاخ ( اشلون اتنام )
اشلون اتنام ... يمعدل بالگبور
وردناك الخواتك عين ناطور
( وانريدك لو صارت عازه )
ردناك الخواتك عين والي
ارجع لاتعوف البيت خالي
يهد الحيل يفراگ الغوالي
وخله النار بين اضلوعنه تفور
( يانار اغيابك لهابه )
ضلت نار مشتعله بگلبنه
شايل وين ياشمعة دربنه
انريد انعاتبك واسمع عتبنه
چا ياهو اليلمنه وغرب السور
( والسور العالي امشيعينه )
غرب سورنه العالي وتهدم
چا ياهو اليلمنه وين نلتم
شفنه الضيم من كل صوب غيم
ظلمه ايامنه الچانت تشع نور
( ودعنه الچان امضويهه )
ظلمه ايامنه الچانت زهيه
لاوديت طارش لاوصيه
انته ازماطنه وانته التچيه
بالكلفات منك ناخذ الشور
( والكلفه اتحلهه وتگضيهه )
بالكلفات ناخذ شور منك
شايل ماترد للبيت اضنك
خطارك يجي وشنگله عنك
غاب اهلالنه والعيد مكسور
( واهلال الدنيه امضيعنه )
غاب اهلالنه ومايهل بالعيد
والله ايعين كلمن فاگده اعضيد
لانگدر تعن لاتگدر اتهيد
اشمالك يادهر عالراس ساطور
( سطرات البين اعله الهامه )
اشمالك يادهر تسطر عله الراس
زينب دولبتهه اخلاف عباس
صدر حسين اخوها اگبالهه انداس
وشافت منحره بالسيف منحور
( وبراسه ايهوس ذباحه )
✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر
https://www.tgoop.com/amhejran12345
BY الشاعرة الملة ام هجران العمارچيه
Share with your friend now:
tgoop.com/amhejran12345/17766