𝐄7𝐓𝐖𝐀𝐀 𖢴🍂.

في المناسبات البتتم في البيت (سماية/كرامة.. غداء_العقد. الخ)..
في المناسبات الزي دي في الغالب بيكون في ثلاثة أو أربعة نسوان كدة هم البيخططوا والبيطبخوا والبيقرروا إنه الحاجة دي تكون فطور ولا غداء ولا نسوان بس ولا رجال بس ولا رجال ونسوان ولا فطور للنسوان وغداء للرجال... النسوان ديل كنت بتكيف منهم شديد خلاص.. حربيات ياخ وعندهم حل لي اي مشكلة طارئة بتجي... وأي فرفرة من زول بيحسموهوا ليك في الحال..

من بالليل بتلقاهن ينضفن في التوم ويقطعن في البصل وبتلقاهن عندهن عناقريب جمب الحِلل والكوانين دي وغالبا العنقريب مافيهو التكتح يا دووووب مخدة وطِرقي «طرحة».. تلقاهن نامن آخر زول وقامن أول زول ومن صلاة الصبح ويسلقن الضلع ويجهزن في الكمونية وسلطة اللسود والكباب أبو بطاطس داك.. الناس لمن تقوم تشرب شاي الصباح بيكونوا هم حاجاتهم كلها جاهزة.. وتلقاهن بيوسوسن لي بعض في اضنيهم ومرات بيتكلموا بي عيونهم والناس الحوليهم ما بيكونوا فاهمين حاجة..

غالبا بيكون حددوا ليهن ولدين من اولاد العيلة في اليوم الزي دة بيكون تحت أمرهم.. بتكون انت تحت أمرهم اليوم كله لامن المناسبة تنتهي..
قبل يوم بيكون شيَلوك الحلل الكبار والكوانين وبتكون مشيت معاهم سوق الجمعة جبتوا الزيت والبصل والبهارات وبعداك بودوك السوق المركزي يشتروا الخضار حق المناسبة كله وأي شئ هن محتاجاتنو...

وتلقاهن بالليل حسمن موضوع المعازيم دة وبياندوا الراجل الكبير وبيسألوهو سؤال واحد: ناسك محتاجين كم صينية بعداك بحددوا عدد الخرفان والصيوان البيتعمل برة للكرامة والتاني البيكون ضرا من الشمس ليهن وهن بيجهزن في شيت العزومة كله.. وأول ما يحتاجن شي ينادنك وتلقاهن يا خاتات القروش في محافضن يا خاتاتنهن في صدورن.. ينادنك ويقولولك: فسراع اجر جيبلنا الشي داك...

لمن الحاجات كلها تكون جاهزة بيبدوا يغرفوا اللكل في الصواني وكل واحدة فيهم بتكون مقابلة حاجة.. واحدة تخت الضلع وواحدة تخت المِلحات «التبايخ» وواحدة مقابلة السلطات وواحدة بترص العيش وأول ما الصينية تجهز بيحددوا تمشي وين.. يا نادوك قالوا ليك دي تمشي الصيوان للرجال يا نادوا البنات المكلفات بالنسوان في اللُوَض.. بيكونن واقفات كدة اليوم كله.. ولو في غناء ولا بهجة شغالة تلقى الواحدة فيهن مشت رقصت وهي شايلة «المقصوصة» وادتن كم شبال ورجعت تاني لي غرف اللكل..

كان بتعجبني حكمتهم وحسن تصرفهم السريع.. مافي أي غلطة بتحصل.. كل الحاجات مضبوطة حتى غرف اللكل عنده مقاييس ما عارف جابوها من وين.. وأول ما المعازيم كملوا الغداء بتلقاهن وقفن جهزن «الحِلو».. وطوالي مشوا جهزوا «ترامس» الشاي.. أها لمن كل الضيوف «يتكفوا» حتي تلقاهن ياكلن جمب الحلل والكوانين وبعداك يلمن العدة وكل حاجة تمشي محل جات..

وفي آخر اليوم بيكون معاهم الراجل الكبير ووروهوا الحساب كله.. جبنا دة بي كدة وعملنا دة بي كدة واشترينا دة بي كدة..

ودايما يختمن كلامن بي: الله يعدل الختوة ويجمعنا في الخير وفي خير الوليدات يا رب تلمنا وتحفظنا..

ياخ أنا بحب النسوان ديل شديد وبحس إنهم عبقريات وخريجات الحياة بي معناها الواسع وعندهم ألف دكتوراة في شؤون الأسر0ة... الأمهات أجمل المخلوق في الكون ....
.... أمهات ذي نار الضلع...

www.tgoop.com/basetos/33048

40 views⚠️•جآليلو 𝗚𝗔𝗟𝗜𝗟𝗢, Dec 20 at 10:02

في المناسبات البتتم في البيت (سماية/كرامة.. غداء_العقد. الخ)..
في المناسبات الزي دي في الغالب بيكون في ثلاثة أو أربعة نسوان كدة هم البيخططوا والبيطبخوا والبيقرروا إنه الحاجة دي تكون فطور ولا غداء ولا نسوان بس ولا رجال بس ولا رجال ونسوان ولا فطور للنسوان وغداء للرجال... النسوان ديل كنت بتكيف منهم شديد خلاص.. حربيات ياخ وعندهم حل لي اي مشكلة طارئة بتجي... وأي فرفرة من زول بيحسموهوا ليك في الحال..

من بالليل بتلقاهن ينضفن في التوم ويقطعن في البصل وبتلقاهن عندهن عناقريب جمب الحِلل والكوانين دي وغالبا العنقريب مافيهو التكتح يا دووووب مخدة وطِرقي «طرحة».. تلقاهن نامن آخر زول وقامن أول زول ومن صلاة الصبح ويسلقن الضلع ويجهزن في الكمونية وسلطة اللسود والكباب أبو بطاطس داك.. الناس لمن تقوم تشرب شاي الصباح بيكونوا هم حاجاتهم كلها جاهزة.. وتلقاهن بيوسوسن لي بعض في اضنيهم ومرات بيتكلموا بي عيونهم والناس الحوليهم ما بيكونوا فاهمين حاجة..

غالبا بيكون حددوا ليهن ولدين من اولاد العيلة في اليوم الزي دة بيكون تحت أمرهم.. بتكون انت تحت أمرهم اليوم كله لامن المناسبة تنتهي..
قبل يوم بيكون شيَلوك الحلل الكبار والكوانين وبتكون مشيت معاهم سوق الجمعة جبتوا الزيت والبصل والبهارات وبعداك بودوك السوق المركزي يشتروا الخضار حق المناسبة كله وأي شئ هن محتاجاتنو...

وتلقاهن بالليل حسمن موضوع المعازيم دة وبياندوا الراجل الكبير وبيسألوهو سؤال واحد: ناسك محتاجين كم صينية بعداك بحددوا عدد الخرفان والصيوان البيتعمل برة للكرامة والتاني البيكون ضرا من الشمس ليهن وهن بيجهزن في شيت العزومة كله.. وأول ما يحتاجن شي ينادنك وتلقاهن يا خاتات القروش في محافضن يا خاتاتنهن في صدورن.. ينادنك ويقولولك: فسراع اجر جيبلنا الشي داك...

لمن الحاجات كلها تكون جاهزة بيبدوا يغرفوا اللكل في الصواني وكل واحدة فيهم بتكون مقابلة حاجة.. واحدة تخت الضلع وواحدة تخت المِلحات «التبايخ» وواحدة مقابلة السلطات وواحدة بترص العيش وأول ما الصينية تجهز بيحددوا تمشي وين.. يا نادوك قالوا ليك دي تمشي الصيوان للرجال يا نادوا البنات المكلفات بالنسوان في اللُوَض.. بيكونن واقفات كدة اليوم كله.. ولو في غناء ولا بهجة شغالة تلقى الواحدة فيهن مشت رقصت وهي شايلة «المقصوصة» وادتن كم شبال ورجعت تاني لي غرف اللكل..

كان بتعجبني حكمتهم وحسن تصرفهم السريع.. مافي أي غلطة بتحصل.. كل الحاجات مضبوطة حتى غرف اللكل عنده مقاييس ما عارف جابوها من وين.. وأول ما المعازيم كملوا الغداء بتلقاهن وقفن جهزن «الحِلو».. وطوالي مشوا جهزوا «ترامس» الشاي.. أها لمن كل الضيوف «يتكفوا» حتي تلقاهن ياكلن جمب الحلل والكوانين وبعداك يلمن العدة وكل حاجة تمشي محل جات..

وفي آخر اليوم بيكون معاهم الراجل الكبير ووروهوا الحساب كله.. جبنا دة بي كدة وعملنا دة بي كدة واشترينا دة بي كدة..

ودايما يختمن كلامن بي: الله يعدل الختوة ويجمعنا في الخير وفي خير الوليدات يا رب تلمنا وتحفظنا..

ياخ أنا بحب النسوان ديل شديد وبحس إنهم عبقريات وخريجات الحياة بي معناها الواسع وعندهم ألف دكتوراة في شؤون الأسر0ة... الأمهات أجمل المخلوق في الكون ....
.... أمهات ذي نار الضلع...

BY 𝐄7𝐓𝐖𝐀𝐀 𖢴🍂.