tgoop.com/beserhati_nesteq/14738
Last Update:
ڕەسووڵ سوڵتانی
بێستانەکەی مامەڕەشید و عەلییەکەچەڵ
دەستلەوەڕ لەبەر قرچەی گەرما گەروویان وشک هەڵاتووە. زووزوو دەچن لە بیرەکەی ئەولا کترییەکەیان پڕ دەکەن لە ئاو؛ بەڵام هێشتا چەند قومێکان لێ نەخواردووەتەوە گەرم دەبێ. چەند قومێکی دیکەی لێ دەخۆنەوە و بە سەروچاوی خۆیانیدا دەکەن تا تۆزێک فێنک ببنەوە.
بێستانەکەی مامەڕەشیدم گەشگەش، جێجێ لەبن باڵی گەڵای بڕکەکانەوە کاڵەکێک سپی دەچێتەوە، دەڵێی گەورە کچێک بەئانقەست تۆزێک یەخەی کراسی شل کردووە بۆ ئەوەی بای شەماڵ لە سینگ و مەمکی بگەڕێ و هەتیوە لاوەکەی تامەزرۆتر بکات. کاڵەک لەو گەرمایەدا دەرمانی تینوێتییە.
وەهاب دەڵێ، تا خاڵە ڕەشید بە چالێنانەوە دەخافڵێ، ئاگایەکت لە مانگاکان بێ، دوو کاڵەکی لێ دەدزم.
بەماتەماتە دەڕوا. مامەڕەشید فوو لە ئاگری بن کترییەکە دەکا و دووکەڵ له سەروچاوی دەگەڕێ. سۆزەی با نایە. چا درەنگ دەکوڵێ، چونکە ئاگر ناگەشێتەوە. باوەشێنی دەکا و فووی لێ دەکا. لەو ماوەیەدا وەهاب دەرفەت دێنێ، بەڵام تەنیا فریای کاڵەکێکی قەراغ بێستانەکە دەکەوێ و دێتەوە. مامەڕەشید پشتی ڕاست کردووەتەوە و وەک بۆ نێچیر بگەڕێ، چاو دەگێڕێ. چەقۆمان پێ نییە. وەهاب دەڵێ دەبێ جۆرێک بیشکێنین خۆڵاوی نەبێ. لەتێکی دەدا بە من و دەڵێ بڕۆ لەولاوە دانیشە، بزانێ لەلای یەکترین شک دەکا و دێ. بە قەپاڵان وەردەگەڕێینە کاڵەکخواردنێ. ئاهێکمان بەبەردا دێتەوە و هەناومان فێنک دەبێتەوە.
تا ئاوڕ دەدەینەوە گەیشتووەتە سەرمان.
ئەوە کاڵەکتان لە من دزیوە دایکتان...؟
دەردەپەڕین...
بە جنێودان دەگەڕێتەوە بۆ چاخواردنەوە و هەڕەشەمان لێ دەکا. مانگاکان ڕادەدەین بۆ دەم قۆپییەکەی لای مەزراکانی ئاتابڵاغی. پێش ئەوەی بگەینە ئەوێ، کاک عەلی لە دەم بێستانەکەی ڕاوەستاوە. وەهاب دەڵێ: کاک عەلی پیاوی چاکە.
ـ چۆن چاکە؟
ـ ئەی چۆن چاک نییە؟ هێشتا کاڵەک نەگەیشتبوو، دوو سێ جار خرچەی(کاڵەکی نەگەیوی) داومەتێ.
ـ یانی پێت وایە کاڵەکمان دەداتێ؟
ـ ئەی تۆ ناڵێی بۆچی بێستانەکەی ئەو لە بێستانی هەموو کەس باشترە؟
ـ چووزانم. چونکە خاکەکەی باشترە. باشتری ئاو دەدا...
ـ نەتزانی.
ـ ئەی؟ پەینی زۆر پێوە کردووە؟
نا، نا بۆ هێندە گێژی. دایکم دەڵێ چونکە دڵی باشە. ئەوەنێ بێستانی خاڵەڕەشید هەموو ساڵێ لە نیوەیدا هەموو بڕکەکانی دەمرێ، چونکە دڵی وایە.
دەگەینە لای کوڕەکانی دی. کاک عەلی بانگمان دەکا.
وەهاب دەڵێ: نەمگوت!
دەچین. یەکی کاڵەکێکمان دەداتێ و دەڵێ، عەسرێش وەرن کاڵەک ببەن.
پاییز دادێ. بێستانەکەی کاک عەلی کاڵەکی لێ نابڕێ. دوو سێ عاڕەبانە کاڵەک دەباتەوە ماڵێ. قووڵکەیەکی گەورەش هەڵدەکەنێ و پڕی دەکا له کاڵەک و گڵەبانی دەکا. تا درەنگانی پاییزێش کاڵەک لەوێ هەیە. جاروبار کاکم دەڵێ ئاگایەکت لەو مەڕانە بێ، دەچم کاڵەکێک دێنم. دەڵێم خۆ هەر دەچی، دوو بێنە. دەڵێ نا، گوناحە، با بەشی خەڵکی دیکەش بکا.
دەسلەوەڕ: ئەو منداڵانەی دەستەیەک گامێش و مانگایان پێیە لە دەشتێ.
✔️کەناڵی "با قسەی خۆش ون نەبێت"
https://www.tgoop.com/+7xx41Np2Px84NTc0
BY با قسەی خۆش ون نەبێ
Share with your friend now:
tgoop.com/beserhati_nesteq/14738