tgoop.com/ch_k_t/15360
Last Update:
Eh-hey, qara, ko'zi yoshligim... Dunyosidan uzilganimga ham ancha bo'libdi. Yig'laganing orasida o'lganimni aytib ketay. Menga uzog'i 5-6oy qolganini o'zlaridan eshitmagan bo'lsam ham o'sha qulog'imga behosdan chalingan kundan senga xat yozishga kirishganman. Men o'lmaganman. Xatlarimni esa eng vijdonli pochtalyonga berdim. U men uchun beminnat va navbatma-navbat ularni senga yetqazib turadi. 5-6oyni oldindan ko'rgan oq halatlarni bilmadimu, meni unday qobilyatim yo'q. Bu yerlarni kim aytibdiki, men aytsam. Ammo bir narsa aniq, faqat bir narsa – seni sog'indim. Men uzoq o'yladim, seni tinch qo'yish haqida. Kasalxona derazasi oldida o'tkazgan kunlaring haqqi, chindan unutishingni istab ketdim ba'zi-ba'zida. Lekin menga tushuntirding: sen – meni unutmaysan. Aniqrog'i bunga harakat ham qilmaysan. Tizzamga qo'yib bu xatlarni yarataman, oldingi xatda ham aytgandim shekilli, ozroq qiyshayishlarga parvo qilma. Kimdirga aytib tursam yozib berardi, o'zimdan boshqasining siyohi sevgili bo'lishiga ishonmadim rosti. O'ksima, muhimi yaxshi yashadim. Men ba'zi qonuniyatlarga sevgim bilan muhr bosolmay qoldim xolos. O'lim bilan kelishib bo'lmas ekan. Mendan keyin borgan eng birinchi xatimdagi, eng katta iltimosimni bajarayotganingdan xursandman. Bu xatda ham shu iltimosni davom ettiraman: meni sevsang, yasha! Seni men ham sendek sevdimmi ochig'i bilmay qoldim. Ko'zlaringdan oqqan yoshlaringni badalini qonlarim bilan yuvsam kerak. Yig'lama, demadim. Sen, men dardsiz paytlarda ham yig'larding. "Uvillama". :). Kulasan-a, seni kuldirishni hamon bilaman. Sevgini ilohiylashtirgan kimki bo'lsa hammasidan nafratdaman. Senga bir sirni ochay, tahminiy hisob-kitoblarimga ko'ra 5oy davomida uch yilga yetgulik xatlar, sovg'alar qoldiraman ekan senga. Eng oxirgisi kitob bo'ladi. Ungacha bosilmagan kitoblarim ham asl nusxada senga keladi. Yashashingga arzigulik, shunday emasmi? Seni hozirdan sog'ina boshladim. Menga nimadir ulashga kirgan oq xalatli shu xatlarim tezroq bitishini, sen bu xatlar umuman tugamasligini xohlagandek xohlayapti. Zo'r-a! Hozir nimadir so'z chiqsa butun xonani yana ag'daraman, sochaman, sindiraman. Mening atrofimda to'la shamchiroq hamma istaklarim muhayyo. Bu meni kundan kunga ezyapti xolos. Og'zimdan chiqqan so'z, oldimda jism ko'rinishida paydo. Senga yomon gapirib, uyingga ketkazgan ham shamchiroqdagi mingtadir tilagimdan bittasi. Seni xona tomon yo'latmagan ham men edim. Kechir! Shunday kechir, taskin topay. Yerga shunday moslashay, xotirjam. Meni kechir. Kuraklarim tuproqqa bemalol tegsin. Qurt-qumrsqalar yeyishidan zavq olay... Rosti, meni bunday ahvolda ko'rishingni xohlamadim. Ojizona, bechora bo'lish menga faqat sevgida yarashdi, jonim. Hayotda esa jangchi bo'lishim kerak edi. Sen meni ilojsiz, umidsiz ahvolda ko'rma dedim. Men kirishingni xohlamadim, oxirgi lahzalarim sen bilan o'tishini men xohlamadim. Yaqinlarimni ham kechir! Ular emas, men shunday qildim. Qurib borayotgan ko'zlarim senga boqishini xohlamadim. Ko'zlarim ost terisi shunday qorayib ketgan. Bu seni battar vahimaga solardi. Shu sababdir balki. Mayli, bu xatga hozircha shular. Qayerga borishingni aniqlab berdim, deb o'ylayman. Ular seni ham kutishyapti. Pastda xat keltirgan pochtalyon seni kutyapti, mashinaga shunchaki chiq, u seni olib boradi. Hammaga mendan salom ayt, ularni seni sevganimdek sevganim haqida baralla ayt! O'zingdan yaxshi gaplarni qo'sh. Men senga ishonaman. Sovg'alarni och endi.
BY "Cho'kib ketgan tiriklar"
Share with your friend now:
tgoop.com/ch_k_t/15360