❤️ Цэнтр правасуддзя Леабэн – амаль як дома?

Цэнтр правасуддзя ў Леабэне лічыцца адной з лепшых турмаў у свеце. Ён знаходзіцца ў горным рэгіёне Аўстрыі і месціць 205 зняволеных. Па перыметры турмы размешчаны два надпісы: «Усе людзі нараджаюцца вольнымі і роўнымі ў сваёй годнасці і правах» (гэта тэкст з Усеагульнай дэкларацыі праў чалавека), і «усе асобы, пазбытыя волі, маюць права на гуманнае ўтрыманне і павагу годнасці, уласцівай чалавечай асобе» (цытата з Міжнароднага пакта пра грамадзянскія і палітычныя правы).

Сапраўды – калі глядзець на фатаграфіі, то турма падобна на раскошны гатэль, што прапануе зняволеным вытанчаныя ўмовы ўтрымання. У турэмнай частцы цэнтра правасуддзя знаходзяцца адзіночныя камеры з асобнымі ваннымі пакоямі, міні-кухняй і тэлевізарамі. Апроч таго, у пакоі ёсць поўнапамернае акно, каб зняволеныя маглі бачыць навакольны свет. У зоне адпачынку ёсць спа-салон, баскетбольная пляцоўка і трэнажорная зала на свежым паветры. Зняволеныя таксама могуць скарыстаць дадатковую адкрытую прастору для шпацыраў і камунікавання.

Аўстрыйскі цэнтр правасуддзя Леабэн быў спраектаваны адмыслова для людзей, якія здзейснілі негвалтоўныя злачынствы, знакамітым архітэктарам Ёзэфам Хоэнсинном (Josef Hohensinn) і пабудаваны ў лістападзе 2004 года. Палова турмы занятая пад залу суда, дзе праходзяць паседжанні.

Людзям, якія знаходзяцца ў зняволенні, у цэнтры правасуддзя надаюцца ўсе выгоды, каб яны разумелі, што адбываюць кару, але пры тым пачуваліся амаль як дома.

👤Турма Bastøy – першая экалагічная турма ў свеце

Bastøy – мужчынская турма палегчанага рэжыму (low-security), размешчаная на выспе Bastøy (Нарвегія) у камуне Horten, прыкладна ў 75 км на поўдзень ад Осла. Турма займае 2,6 квадратных кіламетра, у ёй утрымваецца 115 зняволеных – для Нарвегіі гэта самая вялікая турма з нізкай ступенню аховы. У Bastøy усяго 70 супрацоўнікаў уключна з дырэктарам, і толькі 5 з іх застаюцца на выспе нанач. Турма знаходзіцца прыкладна ў гадзіне язды ад Осла.

Некалі турма была калоніяй для непаўналетніх, але пазней была перапрафілявана, а зараз пастаўлена мэта зрабіць яе «першай экалагічнай турмой у свеце».
Колькасць рэцыдыўных злачынстваў у былых зняволеных Bastøy складае 16 %, тым часам як у сярэднім па Еўропе для падобных турмаў гэты паказчык складае каля 70 %.
Зняволеныя жывуць у драўляных катэджах і працуюць на турэмнай ферме. У вольны час яны могуць займацца коннай яздой, вуджэннем рыбы, тэнісам, хадзіць на лыжах. У турме зняволеныя сілкуюцца ежай, прыгатаванай шэф-кухарам, а таксама могуць наведваць саўну. Трапіць у турму можна толькі з парома, які адыходзіць з горада Horten.

Каб адбываць пакаранне ў гэтай турме на выспе, зняволены павінен падаць заяву. Заяву могуць адхіліць, калі ўлады лічаць, што зняволены ўяўляе пагрозу іншым людзям.
За 42 гады існавання турмы была толькі адна спроба ўцячы з яе. Зняволеныя разумеюць, у якіх камфортных умовах яны адбываюць пакаранне, таму не бачаць сэнсу ва ўцёках. Да таго ж, калі ўцекача зловяць, яго адправяць у адну з самых строгіх турмаў.

Мэта Bastøy – перавыхаваць змешчаных у ёй зняволеных. Зняволеныя разам жывуць, разам працуюць, шмат у чым залежаць адзін ад аднаго. У адрозненне ад большасці турмаў па ўсім свеце, канфліктаў паміж ахоўнікамі і зняволенымі практычна няма. У 2014 годзе Bastøy атрымала прэмію Blanche Major Reconciliation Prize за «прасоўванне чалавечых каштоўнасцяў і талерантнасці».

Турма Vught – адна з самых ахоўваемых турмаў Нідэрландаў

Турма Фюхт, размешчаная недалёка ад г. Хертагенбас у правінцыі Паўночны Брабант, лічыцца адной з найбольш ахоўваемых у Нідэрландах і Еўропе. Пабудаваная на месцы былога канцэнтрацыйнага лагера, дзе ў час Другой сусветнай вайны нацысты ўтрымлівалі палонных, сёння яна вядомая сваёй надзейнай сістэмай бяспекі, што робіць уцёкі практычна немагчымымі.

У гэтай турме ўтрымліваюць злачынцаў з Нідэрландаў, так і асабліва небяспечных зняволеных, у тым ліку міжнародных тэрарыстаў, дастаўленых з іншых краін Еўразвязу для адбывання пажыццёвага зняволення. Турма падзеленая на некалькі аддзяленняў: для асобаў з залежнасцямі ад псіхаактыўных рэчываў, з псіхічнымі разладамі, для схільных да суіцыду, а таксама асобны блок для тэрарыстаў. Кожнае аддзяленне мае адмысловыя ўмовы ўтрымання ў залежнасці ад асаблівасцяў зняволеных.

Зняволеныя жывуць у камерах, у якіх ёсць туалет, умывальнік, ложак, стол, кніжныя паліцы і тэлевізар. Агульны душ знаходзіцца на паверсе. У турме ёсць хол з тэлевізарам, канапамі, кухняй, дзе асуджаныя могуць гатаваць сабе ежу, і вялікім абедзеным сталом. Прадукты яны купляюць у турэмнай краме, набываючы іх за заробленыя ў турме або атрыманыя ад сваякоў грошы. У асартыменце крамы ёсць мяса, курыца, нарэзкі, сыры, выпечка і слодычы.

У турме Фюхт зняволеныя маюць магчымасць працаваць у сталярных і слясарных майстэрнях, а таксама навучацца, напрыклад, асновам праграмавання. Для заняткаў спортам ёсць пляцоўкі для баскетбола і валейбола. Сярод зняволеных сустракаюцца прадстаўнікі розных нацыянальнасцяў, у тым ліку выхадцы з Самалі, Марока, Арубы, Сурынама і Антыльскіх выспаў. Шмат якія з іх — мусульмане.

Турмы Нідэрландаў, у тым ліку Фюхт, уваходзяць у катэгорыю самых упарадкаваных у свеце, што прыцягвае адмыслоўцаў з розных краін для вывучэння такога досведу.