tgoop.com/eltuz2022/32023
Last Update:
ФАРҒОНАДА ИИБ ХОДИМЛАРИНИНГ ЗЎРАВОНЛИКЛАРИ
«Ассалом алайкум, сизга Фарғонадан ёзяпман. Шу йилнинг 21 ноябрь куни Фарғона вилояти Фурқат тумани марказида ички ишлар ва Миллий гвардия ходимлари хусусий тадбиркорнинг эри йўқлигида дўконидан куч ишлатиб, мажбуран олиб чиқиб кетишган ва ИИБ биносида асоссиз равишда 8 соат ушлаб туришган. Тадбиркорнинг эри ва 15 ёшли ўғлини ҳам куч ишлатиб, олиб бориб, асоссиз равишда ИИБ биносида тунги соат 2 гача ушлаб туришган.
ИИБ ходимлари ўз айбларини яшириш мақсадида дўконга қайтиб келиб, дўкон камераси хотирасини дўкон эгасидан рухсатсиз ечиб олиб кетишган. ИИБ ходимлари аёлни машинанига мажбуран ўтқазганидан сўнг унга нисбатан турли уятли сўзлар ишлатиб, шилқимлик қилишган.
Гувоҳларнинг айтишича, ИИБ ходимларидан икки нафари спиртли ичимлик таъсирида бўлган.
ИИБ ходимлари тадбиркорнинг вояга етмаган, 15 ёшли қўл жанги бўйича Осиё чемпиони бўлган ўғлини гуруҳ бўлиб урган ва тан жароҳати етказган. Улар 10 ёшли қизини ҳам олиб кетмоқчи бўлиб қувган, шу пайтда қизча қўрқиб қолиб, сийдик ушлай олмайдиган ҳолатга тушиб қолган.
Хусусий тадбиркорнинг аёли ИИБ биносида саломатлиги ёмонлашиб, қон босими кўтарилган бўлса ҳам, ваҳшийлик кўрсатган ИИБ ходимлари тез ёрдам чақирмаган ва уни мажбуран ушлаб туришган.
Гувоҳлар ва тадбиркорнинг оила аъзоларидан қўл телефонларини тортиб олиб, телефон хотирасини ўчириб беришган. Улар шу орқали ўз қилмишларини яширишга уринмоқдалар.
Бир ой олдин хусусий тадбиркор Раҳмонов Авазбекни ИИБ биносига чақириб, мажбуран соқолини олдиришган ва уни суратга олишган. Агар соқолини олмаса, чет элга чиқиш учун паспорт бермасликлари, Ҳаж зиёратига бора олмаслигини айтиб, қўрқитишган. Шунингдек, ИИБ ходимларининг "қонуний талабларига" бўйсунмаганликда айблаб, 15 суткага қамаш билан таҳдид қилишган.
Юқори турувчи ташкилотлар в инсон ҳуқуқлари бўйича тегишли идоралардан тадбиркор ва унинг оила аъзоларини ҳеч нарсадан қайтмайдиган ИИБ ходимларидан ҳимоя қилишларини, ИИВдан мазкур ҳолат бўйича ИИБ ходимларининг хатти-ҳаракатларига изоҳ беришларини, Бош прокуратурадан эса ИИБ ходимларига қонуний чора кўришларини таъминлашларини сўраймиз.