tgoop.com/fatame00/11604
Last Update:
بسم الله الرحمن الرحيم
اللهم صلِّ على محمد وآل محمد
(المحاضرة الواحد والاربعون)
(وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ)
-*اهل مكة العرب كانوا يرسلون ابنائهم للبادية لاجل الرضاعة
عله اعتبار مناخ جو القرى افضل من جو المدينة، يعني الطفل ينشئ صحيح البدن خالي من الامراض
ومن ناحية اخرى، العرب البدو معروفين بشجاعتهم واصالتهم
فهذا يتربى عله الاخلاق النبيلة.
يعني كان معروف العربي اذا وعد. اوفى بوعده، اذا اؤتمن ادى الامانة، يكون صبور يتحلى بالحلم.
- فمن اجل اكتساب هاي الصفات الحميدة ترسل قريش ابنائه للرضاعة في البادية؛ وهذا ايضا ينطينه انطباع بان الرضاعة اله دور في نشاة الانسان، اذا كانت المرضعة صاحبة فطرة سليمة، صاحبة اخلاق، صاحبة دين.
الجنين يكتسب منه. هاي الصفات الكمالية الي تدل عله شجاعة الانسان.
ف احنه اليوم بعضنه ما مفتهم الشجاعة شنو، او مفتهمه غلط.
يعني افرضي الاب الام يربي الولد الي يضربك وحدة ردهه عشرة
يفهمون الطفل اذا تمشي بشارع لا تخلي طفل ما تضربه صير سبع! لا تصير جبان، مفهوم الشجاعة،يصير عند الطفل هو السب و
الشتم، الضرب والعداوة!
فتترسخ هاي الفكرة عند الطفل، انه
لازم اخلي الاطفال بالشارع كله تخاف مني... عجيبة عبالك احنه عايشين بغابة. القوي ياكل الضعيف.
وهذا مسكين الطفل، بعد فترة راح يبدا يعاني من سلوكه هذا، تصير عنده اضطرابات نفسية ، لان الاطفال ما يقبلون يلعبون وياه، اكيد. لان هو الوحش المفترس بالنسبة الهم، منو يتقبله؟! سلوكه كله عنف تصرفاته اغلبها هجومية.
فمن هنا تصير العقد النفسية عند هذا الطفل وينشى ويكبر وهو يحمل العداوة والحقد والكره للمجتمع. والله وحده الي يستر من يكبر.
ليش لان العصبية هذا دربه، تاخذ الانسان للشتم، ويتعلم عل السبات
وروحه متنرفزة، وهذا الشتم مثل دين
يعني المشتوم يگله للشاتم تعال اني اطلبك.. وهاي نبقه بهل الدوامة ، ما نگدر نعيش السلام الروحي، اصياح وشد اعصاب
والدنيه مشحونة.. يعني الطفل الي عايش بهيج اجواء مشحونة
حتما راح يتاثر بسلوك،الوالدين
يشوف الاب الام، اشبه بالنار جوه الرماد، بس تهفيله، يشتعل، يگب.
خو اذا صعدت عنده لا توكف گباله..!
طبعاً الغضب والعصبية مشكلة كبيرة، لان الانسان يفقد التحكم بافعاله بعقله، ما يسيطر عله اللسانه ، لا عله ايده، بحيث لو تجيب كاميرا وتصوره، وره ساعة اذا تشوفه هل التصوير، ينصدم.
سب وشتم وصياح، العقل واگف، طبعاً الناس الي يفقدون التحكم بغريزة الغضب، ناس ضعيفة... لان الهدؤء والتصرف بساعة الغضب بتاني يدل عله حكمة الانسان يدل عله رشد هل الانسان.
-* الامام السجاد عليه السلام
ضافوه جماعة اشخاص، فامر غلمانه گلهم جهزوا الطعام، واشوو اللحم، راح احد الغلمان يحضر اللحم عل النار، فوقعت قطعة حديد حامية عله احد اولاد الامام كان طفل صغير ومات بساعته.
الغلام خاف ارتعب شلون انقتل الطفل ابوه، شلون، امه شلون؟ اجه كدام الامام، عاين اله الامام، الغلام گال للامام
والكاظمين الغيظ، الامام گاله كظمت غيظي، گاله والعافين عن الناس، گاله عفوت عنك، گاله والله يحب المحسنين، گاله اذهب انت حر لوجه الله تعالى.
الحقيقة المسألة مو سهلة، شخص قاتل ابنه گباله حته وان كان مو متعمد وخطأ.
يعني احنه لو ناخذ موقف قتل ابن الامام علي السجاد عليه السلام
وموقف الامام.. ونعرضه عله الي جاي يصير ويانه اليوم ، اذا شخص ابنه افرضي انقتل بالخطا. شنو راح يسوي الاب، شنو راح تسوي عشيرته، جيب الفصل وودي الفصل، واذا يخاف الله سبحانه
يكتفي بالدية الشرعية، يعني ارجوچ الامام ما كان يعرف الدية مثلا، يعني الامام هو اصل التشريع.
لكن گلنه الحلم والصبر
والتحلي بالصبر هاي شجاعة.
فكانه تصرف الامام يگول. مو من تكسر وادمر؛ وتصير صاحب عضلات، انت شجاع لا، هاي مو شجاعة تربي ابنك عله روح الانتقام والعداوة ويكره الناس وما يعرف يعيش ويتعايش مع الناس بسلام، الحلم والعفو هاي صفات الانسان المؤمن.
📌انت بهاي المواقف تثبت قوتك وشجاعتك الايمانية وتعلم ابنائك التسامح روح كبيرة.العفو عند المقدرة كما يقال.
-* يعني البعض هواي متقيد بالواجبات والمستحبات وتارك هاي الامور.
((هاي للطرفة))
اكو امراة فاسقة وطالعة من الطريق اجلكم الله. استوقفت رجال متدين بالطريق كالتله يا فلان اني ظاهري وباطني نفس الشيء (شي واحد) يعني كانه تكلي الناس تعرفني فلان المنحرفة
المبتعدة عن الله لا صلاة لا صيام
خوف من الله ما عندي، فظاهري وباطني واحد.
بس المشكلة انت المتدين الي الناس تعرفك بصلاتك وصيامك وووالخ،
باطنك مثل ظاهرك، لو بس حچي...
يگول هذا ضل يتامل ويفكر بكلامه شافه عميق، فيذكر انه دخل داره وما خرج منه الا جنازة.
يعني ما طلع من داره الى ان مات.
BY محاضرات بلاغية
Share with your friend now:
tgoop.com/fatame00/11604