tgoop.com/haaaaaaaa22222/404
Last Update:
عاشر ليلة انحس من هسه الموت امحظر
راس ويمه اثنين اچفوفه و صدر امطشر
ولون العبي صار اتراب
و كل المخيم عطاب
الله اكبر .. الله اكبر
——————————
الله يستر كلشي حومر حتى گاع الله الچبيرة
راس مگطوع بهداوة وزلمة ملموم بحصيرة
صبح باجر خيل تسحگ فوگ الاسم الله الاخيرة
سهم ياكل عين وجهك وين ما وجهك تديرة
الشمر من حقد گلبه استخدم الليل
اعله سحگ احسين جاي ايدرب الخيل
شيصير احسين امن العاشر الله يعينه
ولده وربعه ودم اخوانه ايطب ابعينه
كل موته محسوبه احساب
وكل المخيم عطاب
الله اكبر .. الله اكبر
———————————
باجر بعصرية سودة اتطبق الدنيا مثلها
الحايط ايطيح اعله اهله والخيم هم فوگ اهلها
كلشي يخزر ببو سكينه والفرس حدو رجلها
امن السحگ ينگطع نفسه وحتى بسچ ما يگلها
عشرة اتحظرن مو وحدة واثنين
چا معناها راح ايضيع الاحسين
عاشر ليلة وصورة مذبح يم كل نجمة
اتدور زينب وين ابن امها تريد تشمة
طاري الصبح لا ينجاب
وكل المخيم عطاب
الله اكبر .. الله اكبر
————————————-
الله ما يرضاها ندري احسين راسه بدمه مخضب
الشمر يشرب ماي بارد والاحسين بدمه يشرب
امن الامدافع والامراكض چم متر للخيمة يگرب
السالفه وما بيها باچر راسه فوگ الرمح ينضب
باچر زينب تأشرله بالصوت
وكت ترهملك الحصران تابوت
باچر ستر الله يسلبونه وينشگ ثوبة
باچر شيب احسين يحومر مثل اغروبة
من ظهره يطلع نشاب
و كل المخيم عطاب
الله اكبر.. الله اكبر
———————————
باچر ايوّج المخيم والرماد ايصير كحلة
باچر العاگول بالطف بزته بزة النبلة
باچر الرماح بيده ايعذب احسين ويكتلة
يروح يشلع رمحه الاقدم وبرمح ثاني يبدلة
رمح احسين باچر يفتح اصواب
يطب امن الصدر يوصل للتراب
جاي اتخيل گلبه الدافي وحافر داسة
ودم وطبرة وچم احجاره اتنام براسة
ويبوگ روحه السلاب
وكل المخيم عطاب
الله اكبر.. الله اكبر
————————
باچر ابن الزهرة يعطش والنهر كل مايه بارد
مايريد النهر كله گطره وحده احسين رايد
باچر الرحمه الچبيرة الطبعه فاهي اعليها صاعد
و خير من الله الخناجر عمت عيني حسين واحد
عله الرگبه تره اتسمي اليذبحون
ويطيح احسين بيد الما يسمون
وزينب شتشد من اجروحه التنبع بالدم
السبحة اهون من جسم ابن امها الما يتلملم
والطف يركض الشيّاب
و كل المخيم عطاب
الله اكبر .. الله اكبر
————————-
علي هادي الخزعلي
BY الخادم علي هادي الخزعلي
Share with your friend now:
tgoop.com/haaaaaaaa22222/404