tgoop.com/haaaaaaaa22222/421
Last Update:
لمولاتي حميدة عليها السلام
امن الكوفة هب الهوة .. وطاح الدمة بنينوه
من شفته گلبي نچوة .. وهدّمني
شمعناها راسي انمسح؟ .. بس لا ابوي انذبح
كلشي امامي اتضّح .. يتمني
————————
هي البنية الزغيرة بلا ابو تصير شكبرها
و ينذبح راس الطفولة وياكل الشيب بعمرها
اليمسح بچفه اعله طفله عظّم اللهُ اجرها
توني غفيت بخيمتي وهب الهوه العالي
طاح الدمه اباب الخيم بي ريحة الغالي
ياربي سترك صحت .. وطيحت مخيّم طحت
خذته بأديه ورحت .. يم عمي
ياعمي گلي شكو .. هذا الدمه بي دفو
الدم هذا من الابو .. لو دمي
________________
حسين صاحاني وگمتله والدمع غاسل لحيته
گلي وينج يا حميدة وانه مثل الريح اجيته
يبچي مثل الدافن امه ولازم اصفاحه لگيته
حسبالي عباس انكتل چي لازم بظهره
گمت اقره بآيات الشرح ما ينشرح صدره
كضيت ادينه وبچه .. وظل ساكت وما حچه
وعالخيمه راح انتچه .. يا ساتر
هذا انكساره الصعب .. رايدله قوة گلب
آنه وفضولي حرب .. عالصاير
———————-
گتله عمي بداعة أمك سولف وماگول سرك
ذاك ابو فاضل يلالي ليش لازم هيچ ظهرك
نشف گلبي وراح اموتن حطني ياعمي عله صدرك
يا عمي ما بادي الحرب بس انت شو فاگد
ولدك واخوتك بالخيم ما ميت اي واحد
كل الزلم سالمه .. من ياهو هذا الدمه
محلفتك بفاطمه .. و بالاكبر
مو گلبي راسي نشف ..من گتله وجهه اختلف
ودار الوجه للنجف .. و اتعذّر
——————-
گلي بالطف كلها عدله لكن الميّت عضيدي
خاف اسولفلچ حميده وخافن تموتين بيدي
گتله ابن الحنفية ؟ گلي لا مذبوح عيدي
دنيلي راسچ گال الي وظل يرجف احساسي
حسيته راسي بلا نحر من يمسح براسي
انه ادري بالينمسح .. معناها ابوه منذبح
والجثه من السطح .. مشموره
بالصار گلبي دره .. وحيره وعلي محيره
عن الذبح تنقره .. يا سوره ؟
—————————
گلي مسلم راح منچ وانه ابوچ وانه عمچ
اختچ اعتبري رقية وزينب اعتبريها امچ
و من اموتن يا حميدة ذولة اخوتچ بعد يمچ
عد زينب امأمنچ بعد مسحيهن اعيونچ
ما حط أمانه برگبتي خافن يذبحونچ
قوي الگلب عالسبي .. واتخفّي جوه العبي
بعيوني خدرچ نبي .. ويعنيني
بت مسلم ادللي .. اوحيدّتي انتي وهلي
چنچ رقية وعلي .. تشبهيني
———————
علي هادي الخزعلي
BY الخادم علي هادي الخزعلي
Share with your friend now:
tgoop.com/haaaaaaaa22222/421