tgoop.com/haneen_Ali_Faris/10499
Last Update:
لطميه لمأسآة السيده زينب عليها السلام بعد فقدها اخاها الامام الحسين عليه السلام
آيزينب آيذبح ازلامها
آيزينب آيحرگ اخيامها
بكربله مهضومه وضايعه ومظلومه
آيزينب آيزينب
بكربله مهضومه بت حامي الحمه
ضايعه وامست اخيمها امهدمه
تنحب ويلهب گلبها امن الضمه
ليش مال البين وي بت فاطمه
خله كل اخوتها بالطف نايّمه
واليتامه بالبراري هايمّه
دولبتها اهمومه بكربله مهضومه
آيزينب آيزينب
البين وي زينب گفه وبچاها
بالغرب من غير اهل خلاها
شلون حال الشاهدت وليها
اجساد عالغبره ويسيل ادماها
لا محب غسلها لا دفناها
وياهو يطلع لو مشت وياها
تنسبي المحشومه بكربله مهضومه
آيزينب آيزينب
شلون زينب لو مشت للكوفه
ابلا اخوان مسلبه ومچتوفه
ايعينها الله بعايله مكلوفه
الجيش يرفگها وتحفها اصفوفه
عگب اخوها وصولة المعروفه
جرح زينب بالگلب شيروفه
من الهضم ملچومه بكربله مهضومه
آيزينب آيزينب
اليوم ملچومه العقيله من الهضم
شافت ابطف كربله هم وآلم
اليوم مشدوهه وتحشم بالزلم
تگول والله اتحيرت يهل الشيم
وحيل مابيه بعد اركض والم
باليتامه الشردوها اهل الظلم
وليلي اجه بهمومه بكربله مهضومه
آيزينب آيزينب
شردو امن ايدي اليتامه بالخلي
من اجاني الكافر او وج منزلي
حاقد وحقده يدفعه وجابه الي
دوّه صيواني وصحت بويه علي
گوم شوف احوال بتك يالولي
الدللتها اليوم مدمعها هِلي
اهنا يسبع الحومه بكربله مهضومه
آيزينب آيزينب
اهنا يسبع الحومه يابويه صحت
شحالي وشحال اليتامه ما شفت
بويه باحزان الطفوف اتوهدنت
من دوه الصيوان باسمك حشمت
هاي كلفه ياعلي وشو ما گمت
اشلون عينك عالهضم يابه غفت
وتحله بيها النومه بكربله مهضومه
آيزينب آيزينب
الچ يم الحزن انه ارثي واگول
وأعله اخوچ الصار ملعب للخيول
ابجاهچ اعله الله يبت بت الرسول
اظل الكم خادمه ودمعي همول
الحساب اعليه ما ريده يطول
وقبلي مني هالنظم باحسن قبول
قبلي هالمنظومه بكربله مهضومه
آيزينب آيزينب
بقلم خادمة الحسين عليه السلام زينب المشرفاوي
https://www.tgoop.com/haneen_Ali_Faris
BY الحسين مصباحُ هدىً و سفينة نجاة ❤️
Share with your friend now:
tgoop.com/haneen_Ali_Faris/10499