tgoop.com/hto67/820
Last Update:
مەسنەوی
ئەوشۆ تەنیایی لە سووچی ئینتیزار
دێ دەچێ دەبڕێ لەمن سەبر و قەرار
سۆز و هاواری دڵی پڕ تاسەمە
تۆی هەموو ئەو ویست و داخوازەی هەمە
هەرچی دەیبینم هەموو ڕەنگی شەوە
بێ هەتا ڕەنگی ژیانم بێتەوە
تاقەت و هەتوانی بێماری دڵم
بێ مەدە چی دیکە ئازاری دڵم
یارەکەی ون بوو لە نوقمی ئەستەما
بێ ببە تاوێ لە ڕووحی خەستەما
بێ هەتا خۆشبەختی ڕووم تێ کاتەوە
دەستی بارانت خەمم بشواتەوە
چەندە موحتاجم بە ئاوێنەی نیگات
بێ حیجاب و پەردەیێ بێمە پەنات
بێ لە ئامێزی شکۆ دا جێم کەوە
هەیبەتی قەسری وجوودم وێدەوە
بێ هەتا شادی وەبیرم بێتەوە
میحنەت و خەم با لەبیرم چێتەوە
یارەکەی دیدە و نەدیدەی من وەرە
پێوقەدەم بارانەکەم تەم لابەرە
شێعری ڕووناکی نەکوتراوی سەما
هەر بەیادت شین و تاریکی نەما
تۆ خەیاڵی ناسکی ڕۆژ و شەوی
ئەو شتەی بانگی دەکەن: هەستی، هەوی!
عاشقت دیتووتە چۆن هاوار ئەکا؟
کەس هەیە بۆ عیشقی وا سەودا نەکا؟
گیانەکەم دڵتەنگم و دووریت بەسە
چی لە دەورەم دا هەیە خار و خەسە
تۆی کە تابشتی گڕی تاوت هەیە
لەو جیهانی هەستە دا ناوت هەیە
تۆی وەکوو بولبول دەخوێنی شێعری حەز
تۆ لە لێوانت دەبارێ شەکر و گەز
تۆی کە باران پەنجە مۆری چاوتە
یەک جیهان حەیرانی هۆنەی ناوتە
تۆی بەری دەستت هەناری تاسەیە
سینگی گەرمت بۆ ئەوین پێناسەیە
مێهرەبانم دەی وەرە! کەوتم لە پا
بێ حوزورت هێز و هەتوانم نەما
خۆم و دڵ هاتووینە دەرگاهی نەزەر
بێ دەگەڵ ئەو جووتە ببڕە ڕێی خەتەر
خۆزگە ئەو ڕۆژەی #هەتاوی دڵ هەڵات
بێژێ یارت هات و هات و هات و هات
#هەتاوخورشیدی
BY خاڵخاڵۆکە☀
Share with your friend now:
tgoop.com/hto67/820