tgoop.com/huzurkitoblari/1127
Last Update:
#finished
Fransuz yozuvchisi Per Bulning "Maymunlar sayyorasi" asarini shunchaki fantastika sifatida ko‘rishning o‘zi yetarli emas. Bu asarga zamonaviy dunyo adabiyoti ijtimoiy va falsafiy izlanish deb qaraydi.
Ilmiy ekspeditsiya notanish sayyoraga kelib, maymunlarning madaniyati, ilmi va siyosiy tizimlari insoniyatga juda o‘xshash ekanini, lekin bu yerda odamlar yovvoyi va aqlsiz mavjudot sifatida qaralishini bilib hayratga tushadi. Shu orqali muallif insoniyatning tafakkur va axloqiy qadriyatlari haqidagi falsafiy savollarni keltirib chiqaradi.
Jamiyat qanday bu ahvolga keldi, insoniyat qaysi nuqtada xato qildi, qanday qilib maymunlar(maymunlarni siz haqiqiy maymunlar deb qaramasdan o‘qib ko‘ring) jamiyatda asosiy figuraga aylandi? - kabi savollar ongingizda javob izlay boshlaydi. Muallifning ham maqsadi shu bo‘lgan ersa ajabmas.
Asar qahramoni Merouning maymunlar jamiyatida o‘z o‘rnini topishga urinishi, o‘zining madaniy va tarbiyali ekanini isbotlashga majbur bo‘lishini ham yozuvchi mahorat bilan ifoda etadi. O‘quvchi darajasi va o‘ylantirgan mavzusi tomondan qarab buni turlicha anglashi mumkin. Bu asarning turli burchakli, keng vektorli ekanini anglatadi. Qiziq jarayon.
Yana insonlarning maymunlar, sichqonlar va turli hayvonlar ustida shafqatsiz tadqiqot o‘tkazishlarini "Maymunlar sayyorasi"da insonlarni yovvoyi hayvon hisoblab ayni shunday tadqiqot o‘tkazishlari o‘quvchini xayoliy, ammo juda ishonchli qurilgan parallel olamga ko‘chirib o‘tkazadi. Insoniyatning umumiy xatosini shunday oson tushuntirib qo‘yadi yozuvchi.
Albatta, yuqoridagilar mening shaxsiy fikrlarim. Sizning kitobdan olgan xulosalaringiz farqli bo‘lishi mumkin. Romanni qanday qabul qilishingizni faqatgina uni o‘qib ko‘rgandan keyin bila olasiz. Shunday ekan tezroq boshlang. Fikringizni mana shu post izohida kutaman!
