tgoop.com/huzurkitoblari/1131
Last Update:
#kitobxon_fikri
Men uni ko‘rdim!
Odatda kitoblarni uyda — hammadan holi joyda o‘qiyman. Lekin bu asarni negadir ochiq havoda o‘qigim keldi. Har kuni repetitordan chiqqanimdan keyin “Ochlik”ni qo‘lga olaman. Ba’zi joylari ko‘nglimni behuzur qiladi, ba’zi joylari esa hamd aytishga undaydi. Oxirgi yigirma beti qoldi.
Roman qahramonini xayolimda jonlantirib, qay holatda nimalar qilganini — hamma-hammasini tasavvurimda aks ettirdim.
O‘qishdan har kuni bir vaqtda chiqib, doimgi joyimga boraman. Qaysi hodisani o‘qiyotgan bo‘lsam, xuddi o‘sha voqea atrofimda ro‘y berayotgandek…
Bilasizmi, kitobni o‘qir ekanman, har safar yonimdan xuddi kitobdagi qahramonga o‘xshash bir odam o‘tib qoladi. Ochlikdan yuzlari suyaklariga yopishgan, yog‘och qipiqlari o‘rniga plastik “Pepsi” stakanlarini chaynab borayotgan odam. Egnida kirlikdan qotib ketgan, asl rangi kulrang bo‘lgan, ammo qora dog‘lar bilan bejalgan kostyum. Oyoq kiyimi ham tagligidan ajralib ketgan. Boshida esa issiq kunda ham, menimcha, yo‘qotib qo‘ymaslik uchun majburlikdan kiyib yurgan ilma-teshik shapka...
Men bu odamni bir marta emas, deyarli har kuni bir vaqtda ko‘rardim. Mendan sal naridagi o‘rindiqqa borib o‘tirar, nima qilayotgani yaqqol ko‘rinib turardi…
Ochig‘i, hayotimda birinchi marta bunchalik haqiqatga yaqin roman o‘qishim. Men uni ko‘rdim, men uni haqiqiy hayotda ko‘rdim!
Hammasi real.
Hammasi haqiqat…
©️Shahzoda Abjalova
👉@huzurkitoblari
BY Huzur kitoblari
Share with your friend now:
tgoop.com/huzurkitoblari/1131