tgoop.com/lajmmmm/8431
Last Update:
*محرم الحرام: في رثاء القاسم ابن الحسن س*
*یجاسم یاشهــم یاغالی*
*یجاسم یاثمــــــر دلالي*
*يجاسم مادريت بحالي*
*ييمه* *ييمه*
بروحتك يمه يجاسم راح من عندي النظر
يمه مني انهدم حيلي وانكسر حتي الظهر
من بعد عينك ييــــــــمه گلي شلي بالعمر
ردت بیدینک ییمه اتشیـــــل نعشی للگبر
يجاسم خيبــيت اضنــــوني
يجاسم اعليك اصب عيوني
يجاسم ذولــــــه مارحموني
ييمه ييمه
انه ردتک ذخر لیـــــــه یالولد تبــــگه الی
یالعفتنی ابدیره غربه و انه اضل ابلا ولی
حگی لو الطم و انوحن یمه لجلک بالخلی
حیث ماضل صبر عندی یابجیت کل هلی
يجاسم ضاع من عندي الفكر
يجاسم چتفــــــــونه باليـسر
يجاسم رحم ماعـــــدهم كفر
ييمه ييمه
یمه گلی السهر وینه و وین کل ذاک الوعد
یمه انته الواعدتــنی تبگه تچایــــه و سند
یمه تالی اشلون بیــــــه من عفتنی یالولد
یمه گلی اشلون انسه لو رحت منـــی بعد
يجاسم ليش ماتسمع عتب
يجاسم مااتجاوبني عجب
يجاسم زاد همي و التعب
ييمه ييمه
اشلون تقبل يمه جاسم انه ابقه ابحيــرتي
مو طلعت اوياك يمه وانت گتلي اوديعتي
وانت اتباريني يمه طول دربـــي بمشيتي
موش بيدك يمه يبنـــي عدلتلي الخيمتي
يجاسم انه امـــــــك يالولد
يجاسم غيرك ماعنـدي أحد
يجاسم اعليك ممرود الكبد
ييمه ييمه
ضاع كل تعبي يجاسم وانه امشي للسبي
من كثر ضرب الأعادي يمه ما ضلت عبي
يسطر ابسوطه علينه رحم ماعنده الغبي
واليــتامه بالبــــــراري اطشروا آل النبي
يجاسم ريـت حاضر مامتت
يجاسم امـــــــك انه شيبت
يجاسم ابگاع صبـخه بيتت
ييمه ييمه
*بقلم ام حيدر مكي النصاري*
BY قناة✍️ ام حيدر مكي النصاري
Share with your friend now:
tgoop.com/lajmmmm/8431