tgoop.com/mmakrb/361
Last Update:
رد الظعن مو ذاك الاول .. واسمع بواچي وصوت مقتل
گوه اعرفت نسوانه .. وزينب اجت تعبانه
واسمع بواچي وصوت مقتل
............
من يوم عافوني ومشو .. ظليت اتاني يرجعون
ومن البچي اعليهم بعد .. ما ظلت بوجهي عيون
غالين راحو عني غالين
ضعن الحسين وحتى الحسين
ماشين وين اعزازي ماشين
ظلت عليهم شابحه العين
حسيت سفرتهم طويله .. خلوني انوح ويه العليله
موت السفر عنوانه .. وزينب اجت تعبانه
واسمع بواچي وصوت مقتل
.............
راح الضعن بس من رجع .. ازغرهم يكض صفاح
كد ما عليه اتغيروا .. جان الفضل بيدي وطاح
والليل لـونـه بـيـهم اندار
مشيبين ردوا حتى الزغار
توجع جدمهم كلمة النار
بوجناتهم شمسوي الحجار
منه بهوادج مو تعدو .. ليش بهزايل لينه ردو
تعب الدفن خوانه .. زينب اجت تعبانه
واسمع بواچي وصوت مقتل
.........
ردولي ردت مندفن .. كلهم اتراب وحسرات
كل ما بالوجوه امتعن .. ما اعرف العلويات
والاكثر انه اعليها ونيت
يوم لضعنهم من تعنيت
وجا وينها ام عون انه سئليت
ثاريني من زينب تعديت
بعيوني احشم دورن وياي .. ياهيه زينب هاي مو هاي
متغيره كالت انه .. وزينب اجت تعبانه
واسمع بواچي وصوت مقتل
……..
ردولي ما بيهم ضوه .. ميت ضواهم عالماي
واجدامهم تنزف دمه .. چوتهن النار هواي
گمت احچي وي زينب بالدموع
طافين اجيتو طفية اشموع
وين الضوه الوياچ مرفوع
گالتلي مات وراسه مگطوع
بيديهه دم شويه منه .. شميته ريحة هيل چنه
گتلهه شو ما جانه .. وزينب اجت تعبانه
واسمع بواچي وصوت مقتل
.............
گمت اقره بعيون الفضل .. عبدلله ماهوه يگول
جا ليش حتى اصيار امس .. بالطف ذبيح ومكتول
حسبته يرجع لينه كبران
نكبر سويه نصير صحبان
ليش بضعنهم ما إله امچان
حاچيني عمتي يا ام الاحزان
جا وينه ابن عمي وتنيني .. ردت انه اكحل بشوفه عيني
وبمهده خالي امچانه .. زينب اجت تعبانه
واسمع بواجي وصوت مقتل
.............
اظلم صبح بيت الأهل .. غياب كلهم غياب
كل رجعه ما الهم صفه .. وحشه بغياب الاحباب
والبيت وبلياهم شلون
مثل الوجه بي فاگد عيون
والچانو ويانه يگعدون
راحو بعد لا ما يرجعون
لليفگد احبابه دعينه .. الله يعينه الله يعينه
ويعينهه الحزنانه .. وزينب اجت تعبانه
واسمع بواچي وصوت مقتل
.............
الشاعر علي عبدالله المفرجي
والشاعر محمود محمد العطواني
BY محمود محمد العطواني
Share with your friend now:
tgoop.com/mmakrb/361