tgoop.com/mmakrb/410
Last Update:
الامام العباس (ع) يخاطب القربه (الجربه) بعد اصابتها بالسهم اثناء المعركه
خايف ـ انه الما اعرف الخوف خايف
بخيام الحسين اطفال عـايف
بس هلمره اريدج كون ويــاي
لـخـيام الحسين نوصل الماي
ـ
بس هل مره عينيني ـ اوصل الماي لحسيني
لوما بالسهم تنصاب ـ جا ضميتج بـعـيـنـي
سهم بنحري ذابحني ـ وسهم بعيني ما همني
بس يل جربه والعباس ـ سمهج هوه طيحني
كلفه ـ نصابيتي وتبده الماي منج
وانه بلا جفوف شلون المج
محتاج لفزعتج كـلش هــواي
لـخـيام الحسين نوصل الماي
ـ
مايج ردته يل جربه ـ امن ايدي زينب تشربه
بس من شفته منج طاح ـ عشت بحسرة الغربه
صرِت بطيحتج حاير ـ موذر واكسر الخاطر
جان لمايج الي طاح ـ شفاه مفطره تناطر
ويلي ـ سهمج بيه انه ولا بيج ردته
الصابج كون صاباني بضربته
لَونج سالــمه متهمني دنـيـاي
لـخـيـام الحسين نوصل الماي
ـ
وداعــت حــيــدر وبخته ـ طاح الماي من شفته
طحت ويا انه اعله الكاع ـ وكض حسين خاصرته
عـايـف انـه بخيامي ـ عبدالله الطفل ضامي
تراوالي بسهم مصيوب ـ لمن طحتي كدامي
وسفه ـ من حر الشمس عطشت خيمنه
اه يـل جـربـه وبمايج املنه
تعينيني اعله جرحي ردتج شواي
لـخيام الحسين نوصل الــمــاي
ـ
وي سكنه انه متواعد ـ جا لو عنج تناشد
كونج سالمه تضلين ـ وعكبج كلشي ما رايد
لــو تـسـئـل شكــللها ـ وانــه الـدوم ادللها
خجلان انه منها هواي ـ بجودي ما وصلتلها
طايح ـ عل كاع وسكينه اتاني بيه
بلايه جفوف عل فركه شبديه
طحت بس مني ابد ما طاح هل راي
لـخـيام الحسين نــوصــل الــمــاي
ـ
الصابك هوه صاباني ـ وبلا روح خلاني
انه ومايي يل مذبوح ـ فوك دماك بداني
الكافل ضحه بسنينه ـ وعمره وجفه وبعينه
بس ما ضحه بيه يريد ـ مني ترتوي سكينه
شحجي ـ صابوني بسهم والماي طايح
واسـمـع من خيمكم صوت صايح
والكافل سمعته يـردد بـهـاي
لـخـيام الحسين نوصل الماي
محمود محمد العطواني
BY محمود محمد العطواني
Share with your friend now:
tgoop.com/mmakrb/410