tgoop.com/mmakrb/438
Last Update:
اليفكد امه •• يعيش بضلمه
آويه دموعه اطيح احلامه
وبـلا ضحكه ايكضي ايامه
••••.••••.••••
الما يكله امه امن ايطب داره وكواك الله وليدي تـكـله
تضل بعيونه دموعه مخيمه وخوبن خل يموت احسله
يـهـتـز الفنجان احــذاهـا ومــا يــدري بـ آلام الـدلــه
والما فاكد امه شيدري وعالفركه يـكـول شـكـد سهله
المدمع زايد •• بس للفاكد
وبــس للنوح يشد حزامه
وبـلا ضحكه ايكضي ايامه
••••.••••.••••
حسين يسولف وي غاليته يحجي شويه ويبجي شويه
نسمه انتي ومو حفره امجانج كون نضمج وسط الريه
مـن ليلة دفـنـج للعاشر مــا طالع مـصـبـاح اعـلـيـه
الدنيه انتي الجنتي محليتها وهسه خلافج مـره الدنيه
بلا غاليته •• مضلم بيته
وحسرة كلبه بكثر اسهامه
وبـلا ضحكه ايكضي ايامه
••••.••••.••••
الزلمه شما يكبر بعيونه حضن امه يضل ملجأ روحه
والمن اول عمره تيتم الله الـيـدري شـكـد جـروحـه
الـفـاكد امه يصير مبين مـن دمعة عينه المفضوحه
يبجي شما يذكر كعدتها وبس الموت ايسكت نوحـه
وحشه سنينه •• وتهمل عينه
وبس اللوعه تصير ولامـه
وبـلا ضحكه ايكضي ايامه
••••.••••.••••
اليـفـكـد ام واخ دمــوعـه تـنزل مثل السيل وحمره
وحسين امه الكسرت كلبه والمحسن هم كاسر ضهره
وحركة فركاهـا الام تبقه بـكـلـب الفاكد مثل الجمره
وصدر حسين مجمر باقي لحد ما لعبت خيل بصدره
يبجي وينحب •• هوه وزينب
وحيدر يمـه يـدك عالهامه
وبــلا ضحكه ايكضي ايـامه
••••.••••.••••
بيت وما بي ام ما ينطب ومصباح العيد يضل وحشه
والشالو نعش امه اكباله بـعيونـه اهون شيلت نعشه
بطرف اهدومه يصير الفاكد يمشي ويتعثر بالممشـه
مـن كبر امه تـراب يلمـلم وفوك الراس يضل يطشـه
يشيل عيونه •• فوك متونه
وموش شماغ دموعه لثامه
وبــلا ضحكه ايكضي ايـامه
محمود محمد العطواني
BY محمود محمد العطواني
Share with your friend now:
tgoop.com/mmakrb/438