tgoop.com/mmakrb/447
Last Update:
هنيالج ـ هنيالج ـ يام البنين
ـ
يفخر العشاير ـ طلكتي بكواسر ـ تره اربع عساكر
موش اربع اولاد
اقلهم يعادل ـ يفاطم كبايل ـ يبت الاصايل
يا نسل الامجاد
ها يا ضنوة حزام يا لبوة ولينه
ابنج بين الرجال ما يحصل قرينه
ويدافع باليّسار لو كطعوا يمنه
من حد كربله الزود واصل للمدينه
لاولادج ـ لاولادج ـ مامش قرين
هنيالج ـ هنيالج ـ يام البنين
ـ
وحك المجالس ـ بنينج اشاوس ـ تراهم محابس
بجفوف الحسين
يطيحون امامه ـ تراهم نشامه ـ مثل يوم القيامه
بارض الميادين
عبدالله اويه عثمان هيبه ورفعة الراس
الهم بـالـمـيـاديـن حاشه طارف انداس
جعفر هد على الجيش سيفه ينكط احساس
واسمه اليرعب الكوم هوه الهيبه عباس
فدوه احنه ـ فدوه احنه ـ لنحر الحسين
هنيالج ـ هنيالج ـ يام البنين
ـ
بنينج غياره ـ شجاعه ومهاره ـ خذوها بجداره
لصوله بالطفوف
وكمر هل لعشيره ـ يخوف زئيره ـ ولا صح نضيره
ويضحي بجفوف
تـربـات ام الـبـنـيـن اسمه يخوف الجيوش
كـدامـه هـل اعـداد ما ضل مـنـهن طـروش
يفدي بروحه الحسين طوله كباله مفروش
فوك ركـاب الـرجـال اسمه بسيفه منقوش
خيعونه ـ خيعونه ـ ليث العرين
هنيالج ـ هنيالج ـ يام البنين
ـ
بواسل تره وعز ـ و هل من مبارز ـ العدو كله عاجز
ولدج صناديد
لبن صافي رضعوا ـ ولج هامه رفعوا ـ على القاده هجموا
حيد بضهر حيد
جواهم تره الكاع وكت الهده ترجف
لبيكَ يمولاي يابو الـيـمـه تـهـتـف
حاشاها بالوعود يالبدويه تخلف
وبشورارب هل جيوش ولدج والله تنتف
بالقاده ـ بالقاده ـ ولدج تهين
هنيالج ـ هنيالج ـ يام البنين
ـ
ضريحج نعمره ـ والج نبني حضره ـ ولابو اليمه نقره
اعليه نبجي وياج
يأمنه الجليله ـ وحك العقيله ـ تره انتي الوسيله
كل شده ننخاج
ويانه تقصرين يا مولاتي هيهات
ما فشلتي فد يوم واحد عنده حاجات
ربج يام البنّين خصج بالكرامات
شمعه ابيت الحسين جنتي بكل الاوقات
مثل امه ـ مثل امه ـ كلج حنين
هنيالج ـ هنيالج ـ يام البنين
محمود محمد العطواني
BY محمود محمد العطواني
Share with your friend now:
tgoop.com/mmakrb/447