tgoop.com/noury1217/234
Last Update:
#سيرة_امهات_المؤمنين
🌴السيدة أم سلمة رضي الله عنها
🌼 الحلقة2 🌼
🌻كان ياما كان و مايحلي الكلام
إلا بذكر النبي .. عليه الصلاة و السلام ..
🌼اللهم صل علي سيدنا مُحَمَّد
🌻 وأخيرا وصلت أم سلمه لزوجها وأم سلمه بتقول مفيش بيت حصلوا زي اللي حصلنا ده
🌻ومشفتش حد أكرم من عثمان بن طلحه اللي وصلني لزوجي
🌻 وراحت أم سلمه مع زوجها وأولادها للمدينه المنوره
🌻وعاشوا في سعاده وكان كل همها إن أولادها يكونوا مسلمين بجد وحافظين للقرآن و إن زوجها يجاهد مع الرسول
🌻وفعلا انشغلت هي في العباده وتعلم سُنة النبي صل الله عليه وسلم وتربيه الولاد
🌻 و انشغل أبو سلمه في الجهاد مع الرسول صل الله عليه وسلم وفاتت سنه على وجودهم في المدينة
🌻وجت غزوة أُحد واتصاب أبو سلمه في كتفه وفضل شهر يتعالج وأم سلمه هي اللي بتهتم بيه لغايه ما خف
🌻والرسول صل الله عليه وسلم بعته في سريه لقبيلة أسد بن خزيمه
🌻 والسريه دي يعني غزوة بردوا بس الرسول مش فيها يعني بيبعت الصحابة ويخلي ليهم قائد للسرية أما الغزوة فالرسول بيكون فيها وهو بيكون القائد
🌻لأن قبيلة أسد بن خزيمة كانوا بيخططوا علشان يهاجموا المسلمين
🌻وبعت الرسول معاه 150مقاتل وكان أبو سلمه رئيسهم وقائدهم
🌻وانتصروا ونجح أبو سلمه في مهمته
🌻لكن بعد ما رجع الجرح اللي كان حصله في غزوة أحد اتفتح تاني علشان عمل مجهود وفضل نايم في السرير تعبان
🌻وراح الرسول يزوره أكتر من مرة ولما اشتد عليه المرض
🌻جت أم سلمه وقالتله أنا عرفت إن الست لو زوجها يموت ومتتجوزش بعده حد ربنا هيجمعهم في الجنه مع بعض
🌻ايه رأيك نتفق أنا وأنت إني أنا متجوزش بعدك وأنت متتجوزش بعدي
🌻قالها هتسمعي كلامي لو قلت لك حاجة..قالتله أيوه طبعاً هسمع كلامك
🌻فقالها لو أنا مت لازم تتجوزي ودعا لها إنه ربنا يرزقها واحد من بعده يكون أحسن منه وميزعلهاش و ميأذيهاش
🌻وجه الرسول علشان يزور أبو سلمة ولقى أبو سلمه بيموت فغمض عينين أبو سلمه وقال "إن الروح اذا قُبض تبعه البصر"
🌻يعني الواحد لما يموت بيفضل فاتح عينه علشان يشوف روحه وهي طالعه للسما عند ربنا ولازم إحنا نقفلها للميت بأيدينا
🌻وكان أهل أبو سلمه موجودين فقعدوا يعيطوا بصوت عالي ويدعوا..
🌻فالرسول قال لهم "لا تدعوا على أنفسكم إلا بخير فإن الملائكة يؤمِّنون على ما تقولون"
🌻ومعنى الكلام ده إن لما حد بيموت الملايكه بتكون حواليه ولازم ندعي بحاجه كويسه علشان الملايكه بتأمن عليها وتقول آمين يعني يا رب استجب سواء كُنتُم بتدعوا بخير أو بشر
🌻والرسول قال "اللهم اغفر لأبو سلمة وارفع درجته في المهديين واخلفه في عقبه في الغابرين واغفر لناو له يا رب العالمين وافسح له في قبره و نور له فيه"
🌻وده دعاء بنقوله للواحد لما يموت وأم سلمه هي اللي روته عن الرسول صل الله عليه وسلم بعد ما مات يعني قالته للمسلمين علشان يدعو به للأموات
🌻وقعدت أم سلمه تعيط وزعلت على أبو سلمة وافتكرت حديث الرسول اللي بيقول فيه "ما من مسلم تصيبه مصيبةٌ فيقول ما امره الله (إنا لله وإنا إليه راجعون اللهم أجُرني في مصيبتي وأخلف لي خيراً منها الا أخلف الله خيراً منها)
🌻فقالت أم سلمه الدعاء ده ولما وصلت للجزء اللي بيقول و أخلف لي خيرا منها قالت و من خير من أبي سلمة؟؟
🌻ولكن قالتها علشان تسمع كلام الرسول صل الله عليه وسلم
🌻وبتقول أم سلمه لما انتهت العدة والعُدَّة يا ولاد هي فترة بتقعد فيها الست لوحدها ومينفعش تتجوز إلا لما تخلص الفترة دي
🌻وبتحكي أم سلمة وبتقول خطبني أبو بكر و موافقتش عليه وخطبني عمر و بردو موافقتش عليه
🌻وبعدين الرسول بعت حد علشان يخطبها فرحبت بيه وفرحت طبعاً وقالتله قول لرسول الله إني كثيره الغيرة وست كبيره في السن و اني عندي أولاد صغار ومعنديش ولي علشان يجوزني والولي ده معناه حد يكون مسئول عن الست زي أبوها وأخوها وعمها
🌻فبعتلها النبي وقال بالنسبه للغيره فأنا هدعيلك إن ربنا يبعد الغيرة عنك وأما عن كبر السن فأنا بردو كبير في السن وأما الاولاد فأولادك هما أولادي و بالنسبه للولي فأنا ولي أمر المسلمين جميعا
🌻وبعدين تزوج الرسول من أم سلمه واستجاب الله دعاء أبو سلمه وبعتلها زوج أحسن من أبو سلمة
🌻 إن شاء الله هنعرف حصل إيه تاني مع أمنا أم سلمة
🌼اللهم صل علي سيدنا مُحَمَّد
🌼🌼🌼🌼🌼🌼🌼
https://www.tgoop.com/noury1217
BY سلسلة سيـࢪة أمـهات المؤمنين♥🌸
Share with your friend now:
tgoop.com/noury1217/234