tgoop.com/oriftolib/1978
Last Update:
Ё қўшиб, ё чизиқча билан ёзилсин
Алифбо ислоҳ қилингач, имло қоидаларига ҳам тузатиш ва ўзгартиришлар киритилиши айтилган эди. Алифбо ислоҳини кутиб ўтирмай, бу бўйича таклифларимни саҳифада бериб бормоқчиман. Ўйчи ўйини битиргунча таваккалчи ишини битирибди.
Имло қоидаларидаги бўшлиқлар, баъзи хилмахилликлар тушунмовчиликларга сабаб бўляпти. Масалан, xilma-xil сўзи чизиқча билан, лекин xilmaxillik сўзи қўшиб ёзилиши кўпчиликда саволлар уйғотяпти. Чунки шунга ўхшаш бошқа сўзлар чизиқча билан ёзилган-да!
Имло луғатида хилмахиллик тарзида берилган сўз изоҳли луғатда хилма-хиллик шаклида ёзилган. Бунга ўхшаш бошқа мисолларни ҳам келтириш мумкин.
2013 йилги имло луғатларида рангбаранглик сўзи қўшиб ёзилган. Бу сўз изоҳли луғатда йўқ.
Қарама-қаршилик, қасдма-қасдлик сўзлари эса чизиқча билан ёзилган. Изоҳли луғатда қарама-қаршилик чизиқча билан берилган, қасдма-қасдлик сўзи эса луғатга киритилмаган.
Кетмакетлик кирил имлосидаги луғатда қўшиб, лотинчасида чизиқча билан ёзилган. Бу сўз изоҳли луғатда йўқ.
❗️ Хўш, мен нимани таклиф қилмоқчиман?
Имло қоидаларининг “Қўшиб ёзиш” бўлимига қуйидагича банд қўшиш:
👉 Қисмлари -mа, bа- ёрдамида бирлашган сўзлардан ҳосил бўлган ясама сўзлар қўшиб ёзилади: xilmaxillik, ketmaketlik, qaramaqarshilik, qasdmaqasdlik, rangbaranglik каби.
Йўқ, чалкаштирмайлик, ҳамма жойда чизиқча бўлсин, дейдиган бўлсак, “Чизиқча билан ёзиш” бўлимига мана бундай банд қўшамиз:
👉 Қисмлари -mа, bа- ёрдамида бирлашган сўзлардан ҳосил бўлган ясама сўзлар чизиқча билан ёзилади: xilma-xillik, ketma-ketlik, qarama-qarshilik, qasdma-qasdlik, rang-baranglik каби.
Хуллас, аниқ-тиниқ қоида бўлсин. Турфахиллик бўлмасин.
Сўзларни амалдаги имло бўйича беравердим. Ўзгариш бўлса, тўртта белгини ўзгартириб қўйиш ҳеч нарса эмас.
@oriftolib
BY Orif Tolib
Share with your friend now:
tgoop.com/oriftolib/1978