tgoop.com/qanadli_duyqular/13227
Last Update:
بو گئجه ایسته ییرم دونیایا نیسگیل گتیرم
گؤیدن عیسی کیمی عشقینده بیراینجیل گتیرم
سن اول عاقلیماازل گونکو یئرین اَن گؤزلی
منده قابیلدن ایراق سئوگینه هابیل گتیرم
اینجاریم اولمادی لال سئوگیمی دیللندیره رک
اوره ییندن سؤزونو سؤیله مه یه دیل گتیرم
سنی تانری منه گؤستردی دئدی قابیلی یوخ!
من اوتاندیم کی سنی سئوگیمه قابیل گتیرم
قورخما من اؤلمه ییرم،بیر نئچه گونلوک گئدیرم
سنه جنّت چیچه یی،بوللو قرنفیل گتیرم
سن گئدنده دئدین اوچ گون چکه،چکمز گلیرم
گونون آی اولدو دئدیم آیلارینا ایل گتیرم
منه یوخ سؤیله مه آغلاتما منی من دَلی یم
ائله ایش گؤرمه گؤزومدن سنه بیر نیل گتیرم
چالدین اوخ گؤزلر ایله ماهنیما یایلانمالاری
سازینین تئللرینه بم وورالی زیل گتیرم
سنه گوللوک نه یئتر دونیانی گول له بَزه رم
قاپینا سانما کی بیر باغچا یا زنبیل گتیرم
اسَر-اسمز رحیمی چن بورودو داغ سایاغی
"سازاق"ین آهلارینا ساز دولو نیسگیل گتیرم
#سازاق
@qanadli_duyqular
BY قان آدلی دویغولار
Share with your friend now:
tgoop.com/qanadli_duyqular/13227