tgoop.com/qanadli_duyqular/13238
Last Update:
خزانلار
خزان چاغی
قیزیل گۆنش اوْدلانیبدیر،
آغاجلارین یارپاقلاری
مین بیر رنگه بوْیانیبدیر...
هر یارپاغین بیر رنگی وار،
سئودا رنگی،
حسرت رنگی،
توُتقون، توْزلو،
غربت رنگی...
خزان چاغی، یئل اَسرکن
یاغیر یارپاق،
اؤلگۆن یارپاق.
قالانیبدیر، قالاق- قالاق.
یوْللار اوُزاق، گؤللر درین،
نسیم اَسیر سرین- سرین.
داغلار بیزیم، باغلار بیزیم،
یئرییرکن یارپاق اۆسته
قالماز ایزین...
گۆن یاندیرماز،
سوْنباهاردیر،
سانکی آغاج یارپاقلاری،
لاجوردی بیر متنده
ناقیشلاردیر.
بیر چوخ خزان گلیب، کئچدی...
بیر چوخ کروان قوْنوب، کؤچدو.
بیر خزاندا
یتیم قالدیق.
بیر خزاندا
سئودالاندیق.
اَن نهایت
خولیالارین هاواسیندان
قانادلاندیق.
بیر خزاندا
پارلاق قیزیل گۆنش دوْغدو.
بیر خزاندا
بولود گلیب گۆنۆ بوْغدو...
آنلایارکن خزانلاری
زامان بیزی قوْوالادی...
گلدی زامان، کئچدی زامان...
آیری دۆشدۆک یوردوموزدان.
حسرت قالدیق
سَرین- سَرین بوُلاقلارا
گول- چیچکلی اوْتاقلارا
زامان کئچدی، بیز قوُرودوق
سوُسوز قالان آغاجلار تک.
طراوتدن سالدی بیزی،
بیلمم غربت؟
یوْخسا فلک؟
#حبیب_ساهیر
@qanadli_duyqular
BY قان آدلی دویغولار
Share with your friend now:
tgoop.com/qanadli_duyqular/13238