tgoop.com/rdeaa/38274
Last Update:
كأني بأمير المؤمنين بأول زيارة لقبر مولاتي فاطمة
و قف عندها وقال
مُشكلتي چبيرة او ما بعد تنفَض
ما تتعوضيـن و كلـــشي يتعوَض
ارجعيلي // ارجعي او خلي نرجـع مثل ما چنّة
ارجعيلي // ارجعي او محسن ابنچ طير بالجنّة
ما تتعوضين ما تتعوضين
ـــــــــــــــــــــــــــــــــــــــــ
يا رزق الله الضــــــاعت مني
و مشكاة الــروح القُدسية
هــــــاي اول مـــــــرة اتعنالچ
من گبــــرچ طلعيلي شوية
يعني شلون اشرحلچ وضعي
ابعينچ شوفي شصاير بيه
آي هـــــذا انه القــــالع خيبر
ارجف مــن راسي لرجلية
الدافن صبره بيــــــده بعد شيصبره
و جروحچ غميجة و كسرتچ كسرة
تعـــاليلي // تعالي يا شمعــتي و يـاسي و الحنّة
ارجعيلي // ارجعي او محسن ابنچ طير بالجنّة
ما تتعوضين ما تتعوضين
ـــــــــــــــــــــــــــــــــــــــــ
للمستقــبل چنة انخطط
و نرســــم و انلوّن بالصورة
چا ليش انباگت احلامي
و احلامچ طاحت مكسورة
شبيها الدنية و ما خلتها
تكمل عشــــــرتنه المستورة
يالما زعّلتيـــــــلچ واحد
و زعلانة أرحلتي و مقهورة
وسط البيت تخنگ ريحة اشواگچ
و هذا الشيب كله من ورة افراگچ
اسمعيلي // اسمعي اشلون حيـدر يجذب الونة
ارجعيلي // ارجعي او محسن ابنچ طير بالجنة
ما تتعوضين ما تتعوضين
ـــــــــــــــــــــــــــــــــــــــــ
صوفر بستانچ مــن غبتي
و ظلـت أغصانه ابلا ورگة
يا ساجيتي المنـــها اتروه
ما متفقـــــين اعله الفـرگة
من ساعة ما طبـگوا بابچ
و لهسه انه ابذيـچ الطبگة
كل ليلة اعله البير امسيّر
و ارجع خسران ابلا ملگة
انطي لوين وجهي و انسه موضوعچ
و انه المنكسر چــــن كسرة اضلوعچ
انظريلي // أنظر و شوفي حيلي مـــا بعـــد منّه
ارجعيلي // ارجعي او محسن ابنچ طير بالجنّة
ما تتعوضين. ما تتعوضين
ـــــــــــــــــــــــــــــــــــــــــ
منكوب البيت امن غيابچ
و انصبغت اسود حيطانه
ما چانــت تچهبنه الظلمة
يام البيت أو انتي و يانه
انه و ولــــدچ و ابنــياتچ
شنسوي المغرب لو جانه
و ما أكـدر احچيلچ اكثر
مهضومة ادريچ و تعبانة
اعذريني جرحتـــچ يام ضلع نازف
و خاف احچاية منّي لچمتچ اسف
امسحيلي // أمسحي گومي عن وجهي ذَره المحنة
ارجعيلي // ارجعي و محســـــــن ابنـچ طير بالجنة
ما تتعوضين ما تتعوضين
ـــــــــــــــــــــــــــــــــــــــــ
يم گبرچ جابنّي اجـروحي
و لو قصرت معذورة اعيوني
شلونك اخبارك مــن بعدچ
ألــــزم ظهـــــــري لو سألوني
انــه بخيــر امنين احچيها
و انـــه الخـــابت كل ضنوني
ابعثراتي امبيّن موضوعي
ما داعي تســــــألين اشلوني
كتلتني الهضيمة و هل صرت ناعي
و تعنيت ازورچ و انثـــر اوجـــاعي
دگوميلي // دگومي او عن علي نشدي علي عنّه
ارجعيلي //ارجعي او محســن ابنچ طير بالجنة
ما تتعوضين ما تتعوضين
ـــــــــــــــــــــــــــــــــــــــــ
ما بين جروحچ و جروحي
متـــــأمل طبــــــرة محرابي
يمتى المـوت ايرد يجمعنه
و يطيب اصوابچ و اصوابي
نتلاگه او محـــــسن وَيَّانه
و ننسه العصرة و دفعة بابي
خليني بهالحســــرة اتمنه
و ربّنه اليجبر هــــذا مصابي
ابأمان الله يزهرة نامي راح ارجـع
بنية ازغيرة عندي و خاف لا تفزع
اسمحيلي // اسمحي أرجـــــــع اتانيـني زينبنّه
ارجعيلي // ارجعي و محسن ابنچ طير بالجنّة
ما تتعوضين ما تتعوضين
ـــــــــــــــــــــــــــــــــــــــــ
الحمدلله
#علي_حسين_الكناني
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38274