tgoop.com/rdeaa/38301
Last Update:
وشديناه احزام الخدمه
****
يم الحضره اتحالفنه وصفينه وياك النيه
ويبن الزهره اشما نتعب بالخدمه نكول شويه
والرايه اليوم نعليها وتلوح الغيم انخليها والزهره نريد نواسيها
خدام حسين
بالموكب تدري تخاوينه وبهاي الخدمه تباهينه ضيعنه بموكب تلكينه
يا ضي العين
وعطر حسين اهناك نشمه
*
من كَرب يوم الخدمه واحد ضل يسبك واحد
عابس جاهد بالحومه واحنه بخدمتنه نجاهد
كل عام يهبون انصاره والعاشك ما تبرد ناره وتروج الكاع بزواره
وبكبره اطوف
بحسين اهواي نجنينه يشهد حاضرنه وماضينه والمهدي ويانه ويحمينه
وعيونه تشوف
ونبقه وياه الاخر كلمه
****
من ننخاه وكت الشده يوكف بالشده ويانه
حبينه حسين الغالي وضل يسري الحب بدمانه
لو ضاكت يكظيها الحاجه يوكف للناس المحتاجه ويلبس كل خادم تاجه
ويرفعه اهواي
والخله حسين بدلاله هنياله وميت هنياله يشفعله ويشفع لعياله
وشهود بهاي
واليهواه بس الزلمه
**
خدام ومثل الكافل مفطومين اعله الغيره
احنه حسين اختارينه وما نقبل واحد غيره
والخادم لو دخن راسه فارت بي غيرة عباس يم حسين ايفيض احساسه
ويخضر زود
يكبر بين العالم صيته يدخل بس حسين بريته وبهل الخدمه يموت امنيته
بهدومه السود
وبعاشور اتزيد الهمه
**
كلشي يزول بهل دنيه ويضل حسين الخالد
قائدنه حسين ونقسم ما نتبع غير القائد
خط بالدم درب الحريه وضح معنه الانسانيه حارب اصحاب القمعيه
ذل حكم ايزيد
ايشع نور الكبه ايشوفونه هالنور اشلون ايحجبونه والكمره تسولف بعيونه
احرار ايريد
والتاريخ ايشيد بعزمه
****
تمت
تحسين الخفاجي
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38301