tgoop.com/rdeaa/38309
Last Update:
غايب ابغايب تلاگو هالمسيه
ابو صالح وي گبر امه الزجيه
گلب بالهم منفجع •• قادم ايزور الضلع
هالمسيه •• هالمسيه
…………………………………………………………
گـبر طالـت وحشته
ماكـو وادم زارته • بترابه لهفه
وزاير اموزّر حزن
امن البچي امجرّح جفن • ما لحظه يغفه
ام غـدر بيها الدهـر
و أبن مكسـور الظـهر • و همومه كلفه
بليل الاستشهاد صارت بالمدينه شـلون جمعه
اثنين غيّاب و تلاگوا قائم ويبچي اعل بضعه
لبو صالح هل گبر اعظم جروحه
مثل جده المرتضى طوّل بنوحه
اتراب رشاه بالدمع •• قادم يزور الضلع
هالمسيه •• هالمسيه
…………………………………………………………
بده يطوف اع للكبر
ابعينه مرسوم الكسر • و دموعه هلها
يخط بجدامه الارض
كل جدم يوگف نبض• يذكر طفلها
ابگلبه چانون انصب
مثل نيران الحطب • قنفذ شعلها
يقره بالمقتل ابصوته و يشبح بكل ساعه عينه
مـاكو لا لاطـم و ناعـي يگـعد أگـباله و يعينه
لنّه يسـمع ونّه مـن داخـل گبرها
تون بهداي ام حسن ياذي كسرها
عصر بالباب و دفع •• قادم ايزور الضلع
هالمسيه •• هالمسيه
……………………………………………………………
بده يزور ابجدته
و الزياره ابيمنته • بصوت الرزيه
السلامُ اعالطُهر
السلامُ اعالكسر • و عين الزجيه
السلامُ اعالغصن
الما عرف فتحة جفن • محسن ضحيه
على الاحشاءِ السلامُ النبت بسمار ابوسطها
على العصّابه السلامُ العلى عين وخد تحطها
السلامُ اعالنفس گوه و تشمه
السلامُ اعالدمع تبچي وتضمه
و على الوجه المنصفع •• قادم يزور الضلع
هالمسيه •• هالمسيه
……………………………………………………………
و ظل يسولف وبألم
يمه و بأسمج قسم • ثارج امانه
الطبوا الدارج امس
بأيدي اعلمهم درس • گوم الخيانه
وصاحب احچاية و إن
اطبگ اضلوعه بمتن • واگطع لسانه
و بسمج ارفـع رايه خضـره يا لثارات الزجـيه
گبل جان اموصّه حيدر هسه مشيوله الوصيه
وينه هذا السوه عين الزهره حمره
الا انزل سـقر كلـها ابوسـط گـبره
وين كل ذاك الجمع •• قادم يزور الضلع
هالمسيه •• هالمسيه
……………………………………………………………
طلع صـوت امن الگـبر
يبني يا حـلم العمـر • هاي الوصيه
توصل العِـد شـيعتي
يمـته اشـوفن حضـرتي • بيهم زهيه
انسه عصرات الرجس
وانسه كل سوط و رفس• ابفيهم عليه
يمته اشوف اجفوف سمره بيها ثار وعطر حيدر
يا هـلـه ابـخـدام ابـني بالبـقيـع انصـبو مـنبـر
و انعه انا الوالـده يـحسـين يبني
يلا خل نبچي اعله زينب يلتحبني
وعلى الجف المنگطع •• قادم يزور الضلع
هالمسيه •• هالمسيه
……………………………………………………………
✍️ ( سيد خضر الزاملي )
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38309