tgoop.com/rdeaa/38339
Last Update:
ام البنين عليها السلام
يا من نطيتي كلشي لحسين
صح ميته بس بعدج تقدمين
حتى بوفاتج... انتي وفية
ظل گبرچ تراب...مثل الزچية
يم البنين
.........
بكلبج حسرة ظلت عصرة الباب
ردتي ضلعچ ببسمار ينصاب
وگون الطاح مو محسن على اللگاع
واحد من بنينچ فوگ التراب
تمنيتي لمن هجمت الگوم
ضلعج بچان الزهرة مهشوم
كل امنياتج...هيچ المنية
ظل گبرج تراب...مثل الزجية
.........
بالزهراء كون الصار ما صار
ردتيها بچفوفج تاكل النار
وبين الباب والحايط تروحين
وتعيشين نفس الهجمة عالدار
وخدچ الي لونه تغير
من السطرة ساير لونه احمر
تلچم بالجروح...ذيج الرزية
وظل گبرچ تراب...مثل الزجية
.........
غيرتي اسمج وصار ام البنين
يذكر امه خاف ويزعل حسين
وأبو فاضل بأسمه من تحاچيه
يم حسين يمه ما تكولين
عباس ما گالتله يمه
خافت أبو اليمه تهظمه
عشتي أبيه...ورحتي أبيه
وظل گبرچ تراب....مثل الزجية
.........
كلشي انطيتي مو بس چلمة تنگال
انطيتي لكربلا شما عندچ أعيال
ووصيتي بنينيچ لحد يعود
اذا ابن الزچية فوگ الرمال
ضحي لحسين وترفع الراس
ولحسين انطى كلشي عباس
تشهد چفوفه...والغاضرية
ظل گبرچ تراب...مثل الزجية
......
بيج ولا بزينب تدور الايام
وانتي العلهزيلة طبت الشام
تمنيتي الجره اعله الحره لو بيچ
ولا زينب تحير بحرگ الخيام
بچان العقيلة امنية هاي
لا اخو عندج ولا ألج راي
تمنيتي بالطف....انتي سبيه
وظل كبرچ تراب ....مثل الزجية
مرتضى الربيعي
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38339