tgoop.com/rdeaa/38345
Last Update:
الله يساعدچ يالفاگده حسين
حگج لو دموعچ تجري بالعين
وانطيتي اربع زلم منچ صدگ والنعم
يا ام البنين__ ياام البنين
___
ماشفنه الحسين ومن نذكره انوح
بس يمرنه ذكره نصير كلنه اجروح
وانتي الچان بيتچ عطره منه يفوح
اشصار ابحالچ امن اسمعتي بي مذبوح
هم گلولچ اسوالف على الخيل
من داست بصدره وسحگته حيل
وبهايه عندچ علم_منچ صدگ والنعم
ياام البنين____ياام البنين
____
بشر لمن حچالچ ماحچه الحاله
ماگلچ عزيزچ فوگه خياله
ولا گلچ يحره بحالة اطفاله
وبحرگ الخيم من طشت اعياله
لوبس سامعه وشصار ماصار
لمن بالخيم واشتعلت النار
وماتت رقيه بحلم ____منچ صدگ والنعم
ياام البنين ____ياام البنين
____
مايرجع بعد شيرجعه ابو اليمه
ومكتوب اعله دارچ بالحزن ضلمه
مثل يعگوب عينچ بالبجي تعمه
حسين الچان نعمه وراحت النعمه
راح حسين لا مايرجع الراح
والرايح عزيزه اشلون يرتاح
جرحچ بده ينرسم———منچ صدگ والنعم
ياام البنين ____ياام البنين
_
عن ولدچ اسئلچ وين صارو وين
كون تشوف عينچ طيحة الچفين
وعباس بوگعته وكسر ظهر حسين
اولدچ من مشو واشلون لوتدرين
بحب حسين ذابو مثل الشموع
صدگ يستاهلون انصب الدموع
من عندچ اخذو عزم _منچ صدگ والنعم
ياام البنين ____ياام البنين
__
سواچ الله باب وللكرم خلاچ
لان لحسين بالطف چان كل ارباچ
تمنينه اعلى گبرچ كون بي شباچ
ونجي لصحنچ نزوره ونضل نبچي وياچ
چا هسه اعله بابچ تبچي هالناس
چا غير انتي ام الگمر عباس
ابنچ هذاك الشهم _منچ صدگ والنعم
ياام البنين ___ياام البنين
___
✍️احمد علي البغدادي
محرم الحرام 1445 هـ
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38345