tgoop.com/rdeaa/38367
Last Update:
#قصيده_لشهر_محرم
#قصيده_للخدام
ـــــــــــــــــ ❁ ❁ ❁ ــــــــــــــــــ
يحسين حبك بالگلب وتمـر الاعـوام
خلهم يضدون بحقد عدوان الاسلام
بدمانـه خطينـه العهد
خـدام نــبقــه لـلابــد
الفخر صار بخدمتك وتـرف الاعلام
ـــــــــــــــــ ❁ ❁ ❁ ــــــــــــــــــ
مـولاي وبگلبي انـصب موكب عزائك
خدامك احنه بكل فخر نـرفع لـوائك
عشگك يبواليمه الهوه ونشتم هوائك
ابدونك يضيگ النفس تخنگنه الايام
الفخر صار بخدمتك وتـرف الاعـلام
ـــــــــــــــــ ❁ ❁ ❁ ــــــــــــــــــ
كل يوم جرحك يلچم بگلوب الاحباب
بـدنيه مـاشفنه مثـل امصابك امصاب
مذبوح ويتامـك تظل تـوليها الاجناب
ياوالي بعدك هالحرم يـاوسفه تنضام
الفخر صـار بخدمتك وتـرف الاعـلام
ـــــــــــــــــ ❁ ❁ ❁ ــــــــــــــــــ
بَچَتنه دم امصيبتك عالغبـره مذبوح
حسرات ضلينه نجر وختنگت الروح
لـمن يگولون الجسد تـرسنه الجروح
نـلطم نظـل وننتحب ونـطبّــر الهـام
الفخر صار بخدمتك وتـرف الاعـلام
ـــــــــــــــــ ❁ ❁ ❁ ــــــــــــــــــ
يـبقه عـزائي ويـستمر يـوم القيامه
إنواسي بالزهره وعلي وكل اليتامه
شيعتهم احنه ومانهم هـاي الملامه
خلهـم يلوموني بعـد عبـاد الاصنام
الفخر صار بخدمتك وترف الاعلام
ـــــــــــــــــ ❁ ❁ ❁ ــــــــــــــــــ
اسلامي عالفطره اعتمد مـايكره الدين
عدنه عقيده ومعتقد ونحب الحسين
ونعشگ اهل بيت النبي والهـم موالين
بـاقين والگطـع النفــس نـسمـه خدام
الفخـر صـار بخدمتـك وتـرف الاعلام
ـــــــــــــــــ ❁ ❁ ❁ ــــــــــــــــــ
عندي عقيده ومعتقد وحسين امامي
ادري عليه لـو سلمت يـسمـع سلامي
عـالي اظـل بخدمتي ويـرفع مقامي
شفناها كلمن يخدمـك خـليته گـدام
الفخر صـار بخدمتك وتـرف الاعلام
ـــــــــــــــــ ❁ ❁ ❁ ــــــــــــــــــ
✍️كلمات
#الشاعر_عباس_فاضل_الشمري
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38367