tgoop.com/rdeaa/38368
Last Update:
ام البنين عليها السلام
لا تسأل بعد ام الگمر وين
روحي بكربله ما عافت حسين
٠٠٠٠٠٠٠٠٠٠٠٠٠
آنه ام الگمر يالناشدت عني
مفجوعه وأبد ما ينگطع وني
دوهنّي مصاب حسين دوهنّي
لا دمعي انگطع لا دمعة العين
روحي بكربله ما عافت حسين
٠٠٠٠٠٠٠٠٠٠٠٠٠
آنه ام البنين الماهجع نوحي
مو عالاربعه ماتت قهر روحي
عالمذبوح ضامي تنزف جروحي
شما ضحّيت اله ما اوفي بالدَيَن
روحي بكربله ما عافت حسين
٠٠٠٠٠٠٠٠٠٠٠٠٠
صح جرحي جبير وگبري مو يمه
لكن روحي سكنت گبر ابواليمه
كل ليله اجي وي فاطمه امه
نستقبل ضيوفه والمعـزّيـن
روحي بكربله ما عافت حسين
٠٠٠٠٠٠٠٠٠٠٠٠٠
روحي بكربله تلگوها ونفاسي
بين حسين ابني وبين عباسي
كل زاير اسجله المعتني يواسي
وحفظ صورته بعيوني الاثنين
روحي بكربله ما عافت حسين
٠٠٠٠٠٠٠٠٠٠٠٠٠
آنه ام البنين الطاهره الحره
اذكرني يزاير وسچب العبره
وطلب حاجتك مگضيه والزهره
معروفه بوفائي الموالين
روحي بكربله ما عافت حسين
٠٠٠٠٠٠٠٠٠٠٠٠٠
من تدخل يزاير سلّم علية
تلگاني بضريح حسين يومية
وطلب حاجتك وحسبها مگضية
آنه ام الكفيل الضحّه چفين
روحي بكربله ما عافت حسين
٠٠٠٠٠٠٠٠٠٠٠٠٠
لا تنسى الگمر من توصل تزوره
هم تلكاني عنده ابچي مقهوره
من تدخل ضريحه وترتوي بنوره
حلفه بزينب وصلّي ركعتين
روحي بكربله ما عافت حسين
سيد زيد الفحام
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38368