tgoop.com/rdeaa/38375
Last Update:
قصیدة:چاوین الأعزاز
ـــــــــــــــــــــــــــــــــــــــــــــ
ماعدها جنّاز ساعة دفنها
چاوین الأعزاز ضل عالي ونها
أم اللي ربّت أربعه و سوّتهم أسیاد
یاهو الیشیل أجنازة الماعدها أولاد
ساعة دفنها ضل عالي ونها
ـــــــــــــــــــــــــــــــــــــــــــــــــــــ
اشگد تشیل أحزان..التفگد الولیان..اربعه شبّان..ودّعتهم
هايه أم عباس..الکبّرت فُـراس..بآخر الانفاس..مالگتهم
تعبت علیهم والتعب..گالت یرید أمجازه
هسه اهیه عازتها أجت..یاهو الیسد هالعازه
الماعدها شیّـال یرفع نعشها
حتی امن الدموع یثگل رمشها
ام البنـین ابلا ولـد والـولد ینـراد
یاهو الیشیل أجنازة الماعدها أولاد
طافـح حزنها ضل عالي ونها
ـــــــــــــــــــــــــــــــــــــــــــــــــــــ
بیا نظر واعتاب..تنظر اعله الباب..تدري بالغیّاب..ما یردّون
اشلون اذا میتین..کلهم أمغربین..اربعتهم وین..تبچي لعیون
من طوّح و سار الضعن..ودّت گلبها أویاهم
تدري الزلم لا ما ترد..بس الترد أدماهم
من ذیچ الأیام بدّت بچیها
تدري من اتموت محد یجیها
یوم اعله یوم الحسره ضلّت حیل تزداد
یاهو الیشیل أجنازة الماعدها أولاد
شیرد ضعنها ضل عالي ونها
ـــــــــــــــــــــــــــــــــــــــــــــــــــــ
اشگد ثجیله اهواي..للتضیّع راي..من یگطّر ماي..ابحلگها
من ترید اتموت..یاهو یمها ایفوت..هیّه والتابوت..تبچي حگها
حاچت نعشها المنحني..و محد یشیله اتشوفه
لو حتی ابوفاضل عدل..یا هو الیجیب أچفوفه
وین اهیه لچفوف ضایع أثرها
وین الله عباس یحفر گبرها
وینک یبوفاضل نعش أمک زلم راد
یاهو الیشیل أجنازة الماعدها أولاد
مخیوب ضنها ضل عالي ونها
ـــــــــــــــــــــــــــــــــــــــــــــــــــــ
اشلون ایجیها اشلون..الما بقتله اعیون..عالنهر مرهون..چفه یمّه
ابصدره کومه اسهام..ینلچم لو گام..والعمد بالهام..یجري دمه
یابس عله اعیونه الدمه..یا هو الیدلّي بأمه
عباس من صابه السهم..الدنیا صارت ظلمه
بس وحشة الموت للأم ثجیله
تبچي اعله تابوت محد یشیله
رادت یجي العباس منّه تاخذ أمراد
یاهو الیشیل أجنازة الماعدها أولاد
حنّـت لأبنها ضل عالي ونها
ـــــــــــــــــــــــــــــــــــــــــــــــــــــ
الله یدري الخیل..ابجسمه سحگت حیل..ماله قدره ایشیل..دم جروحه
أمه رادت هاي..للضـعن روّاي..لاتضـوگ الماي..حتي روحه
وفّیـتي یأم الأربعـه..ابدم الـگمر وأخـوانه
نعشچ تشیعه أم الحسن..واهل السمه دفّانه
اجرچ عله الله آه یالحنینه
وافیتي لحسین وانتي حزینه
ریتچ نظرتي اشلون طایح ابوالسجاد
یاهو الیـشیل أجنازة المـاعدها أولاد
یهمل جفنها ضل عالي ونها
ـــــــــــــــــــــــــــــــــــــــــــــــــــــ
عالصدر چتّال..یذبح الآمال..هذه عالعسّال..راس الحسین
جسمه بالطف ضاع..دمه فوگ الگاع..ما بقتله أضلاع..بالمیادین
الف و تسعمیة جرح..کلها ابجسد تتعاله
باقي ثلاثه اعله الترب..محد دناله و شاله
من طاح الحسین سلبو حریمه
لاما شرب ماي بالطف هظیمه
عاد الضعن لاچن بلا والي وعلم عاد
یاهو الیشیل أجنازة الماعدها أولاد
زادت محنها ضل عالي ونها
ـــــــــــــــــــــــــــــــــــــــــــــــــــــ
کلمات خادم الجسین ع
خادم عبد الامیر الناصری المحمره
BY الرادود الحسيني ملاهيثم اللامي قصائد وألحان خادم الزهراء ع🎤
Share with your friend now:
tgoop.com/rdeaa/38375