Tamim’s

"الحزب ؛ مفهوم و عناصر"

ايام قوة الانتفاضة چان اكو جو عام يرفض فكرة الأحزاب كلياً ، مو الاحزاب الحالية ، لا ، الفكرة كلها ، وبما أنه ختم الوطنية والذيولية چان كل واحد شايله بيده و يختم بكيفه ، چان اللي يدعم فكرة تأسيس احزاب ذيل و مو خوش ادمي .

🔹المهم ، هو شنو يعني الحزب ؟
الحزب : جماعة يتفقون على مصالح محددة و مبادئ مشتركة بشكل منظّم هدفهم الوصول للسلطة او المشاركة بيها حتى يحققون اهدافهم لخدمة المصلحة العامة .

🔹بدة ظهور الاحزاب بالعراق سنة ١٩٢٥ ، يعني قرن الا خمسة ، مثل حزب "التقدم" اللي اسسه عبد المحسن السعدون و حزب "الشعب" اللي اسسه ياسين الهاشمي .

🔹زين شنو عناصر الحزب ؟

اولاً ..العضوية : يعني اكو افراد يتجمعون و يسوون الحزب ، فماكو حزب بلا اعضاء ينفذون خططه و برامجه ، مو مهم شكد يصيرون ؛ لأن مثلاً الاحزاب الهيكلية متريد عدد هواي انما تريد عدد يكفي الهيكل العام للحزب ، بينما الاحزاب الجماهيرية تختلف ، هي تريد اعداد .

🔹ثانياً ..التنظيم الحزبي : ماكو حزب مابيه تنظيم معين لأن بدون تنظيم لا يكدر يدوم ولا اصلاً يسمّوه حزب ، انما مجرد جماعة عندها مصلحة خاصة .
التنظيم شغلته البناء الداخلي للحزب ؛ مثلاً شروط الانتماء او الالتزامات اللي تترتب على العضو او كيفية عقد المؤتمرات او اختيار قادة .

🔹ثالثاً ..الأيديولوجية : يعني مجموعة عقائد و قيم و افكار مرتبطة ترسم إطار لحركة جماعة معينة و تحددلها أهدافها . يعني هي اللي تدفع الجماعة للحركة و العمل ، و اساساً السلطة بجوهرها طاقة تريد تخدم فكرة يتبناها صاحب السلطة . فعندك حزب يعني تطبق ايديولوجيتك .

🔹أحزابنا بالعراق اغلبها ما عندها ايديولوجية اصلاً ، هنا يسموهم "احزاب المساومة" : يعني الاحزاب اللي ماعدها ايديولوجيا واضحة واذا عدها افكار و قيم فمو واضحات ، دائماً تلتفت للجماعات المؤثرة بالمجتمع حتى تحصل تأييدها ، فمقياس النجاح بهاي الاحزاب هو عدد المقاعد اللي يفوز بيها مو مثلاً بالثبات على العقيدة لو المبدأ لو الاخلاص لبرنامج الحزب.

@tamimali98

www.tgoop.com/tamimali98/580

608 viewsSep 5, 2020 at 16:23

"الحزب ؛ مفهوم و عناصر"

ايام قوة الانتفاضة چان اكو جو عام يرفض فكرة الأحزاب كلياً ، مو الاحزاب الحالية ، لا ، الفكرة كلها ، وبما أنه ختم الوطنية والذيولية چان كل واحد شايله بيده و يختم بكيفه ، چان اللي يدعم فكرة تأسيس احزاب ذيل و مو خوش ادمي .

🔹المهم ، هو شنو يعني الحزب ؟
الحزب : جماعة يتفقون على مصالح محددة و مبادئ مشتركة بشكل منظّم هدفهم الوصول للسلطة او المشاركة بيها حتى يحققون اهدافهم لخدمة المصلحة العامة .

🔹بدة ظهور الاحزاب بالعراق سنة ١٩٢٥ ، يعني قرن الا خمسة ، مثل حزب "التقدم" اللي اسسه عبد المحسن السعدون و حزب "الشعب" اللي اسسه ياسين الهاشمي .

🔹زين شنو عناصر الحزب ؟

اولاً ..العضوية : يعني اكو افراد يتجمعون و يسوون الحزب ، فماكو حزب بلا اعضاء ينفذون خططه و برامجه ، مو مهم شكد يصيرون ؛ لأن مثلاً الاحزاب الهيكلية متريد عدد هواي انما تريد عدد يكفي الهيكل العام للحزب ، بينما الاحزاب الجماهيرية تختلف ، هي تريد اعداد .

🔹ثانياً ..التنظيم الحزبي : ماكو حزب مابيه تنظيم معين لأن بدون تنظيم لا يكدر يدوم ولا اصلاً يسمّوه حزب ، انما مجرد جماعة عندها مصلحة خاصة .
التنظيم شغلته البناء الداخلي للحزب ؛ مثلاً شروط الانتماء او الالتزامات اللي تترتب على العضو او كيفية عقد المؤتمرات او اختيار قادة .

🔹ثالثاً ..الأيديولوجية : يعني مجموعة عقائد و قيم و افكار مرتبطة ترسم إطار لحركة جماعة معينة و تحددلها أهدافها . يعني هي اللي تدفع الجماعة للحركة و العمل ، و اساساً السلطة بجوهرها طاقة تريد تخدم فكرة يتبناها صاحب السلطة . فعندك حزب يعني تطبق ايديولوجيتك .

🔹أحزابنا بالعراق اغلبها ما عندها ايديولوجية اصلاً ، هنا يسموهم "احزاب المساومة" : يعني الاحزاب اللي ماعدها ايديولوجيا واضحة واذا عدها افكار و قيم فمو واضحات ، دائماً تلتفت للجماعات المؤثرة بالمجتمع حتى تحصل تأييدها ، فمقياس النجاح بهاي الاحزاب هو عدد المقاعد اللي يفوز بيها مو مثلاً بالثبات على العقيدة لو المبدأ لو الاخلاص لبرنامج الحزب.

@tamimali98

BY Tamim’s